Múgedek balasy bar kópbalaly ana: Naqty kómek qashanda kerek
ORAL. QazAqparat - Múgedek balasy bar otbasyǵa naqty kómek qashanda kerek. Bul týraly Oral qalasynyń turǵyny Lázzat Ótepqalıeva aıtty, dep habarlaıdy QazAqparat tilshisi.
Onyń aıtýynsha, Prezıdenttiń kópbalaly jáne múgedek balasy bar otbasylardyń nesıesin jabý jónindegi sheshimi - óte batyl qadam.
«Halyqtyń janyna batqan máseleni sheshýdi qolǵa alǵany úshin Qasym-Jomart Kemelulyna alǵysymyzdy aıtamyz», - dedi jeti balanyń anasy.
Lázzat Ótepqalıeva rııasyz pikirin bildirýmen birge otbasynda qalyptasqan qıyn jaǵdaıdy da jetkizdi.
Óziniń aıtýynsha, jeti balanyń biri Ádilhan týǵannan sırek kezdesetin aýrýmen - súıek synǵyshtyǵy dertimen azap shegip keledi. Jurt «Hrýstal bala» dep atap ketken Ádilhannyń súıegi alǵash perzenthanada jatqanda synǵan eken. Kez kelgen qımyldan álsiz súıek synyp kete beredi.
Toǵyz jyldan beri anasy Ádilhandy Reseı, Úndistan sııaqty elderge aparyp, emdetken. Bul aýrýdyń emi joq, tek dertti jeńildetý ǵana qoldan keledi. 2014 jyly halyqtyń kómegimen qarajat jınap, Úndistanda balanyń kózine ota jasatyp, sodan kórýi durystaldy. Budan bólek, balada gıdrotsefalııa (mıǵa sý jınalý) da bar. Onyń emi - mıǵa ornatylǵan shýnt. Ony da ýaqyty kelgende, dárigerge qaratyp, baqylap otyrý kerek.
Osyndaı aýrýyna qaramastan, Ádilhan úıde oqyp, birinshi synypty jaqsy úlgerimmen aıaqtapty.
Budan buryn Atyraýda turǵan otbasy ondaǵy aýa raıy Ádilhanǵa jaqpaı, dárigerlerdiń keńesimen Oralǵa kóshken.
«Eki jyldan beri qala shetinde 40 myń teńgege páter jaldap turyp jatyrmyz, tirkeýge de jýyrda turdyq. Ár eki aı saıyn Ádilhan arnaıy kýrstan ótip, em qabyldap turýy kerek. 150 myń teńge turatyn pamıdronat dárisin elordaǵa aparyp saldyrý úshin joly, páteraqysy bar, barlyǵy 250 myń teńge kerek. Erim Beısenbaı Qarjaýov vahtalyq ádispen júrgizýshi bolyp eńbek etedi. Sonyń 150 myń teńge jalaqysyna qarap otyramyz. Ol da, árıne, jetpeıdi. Qazirgi kezde úlken qyzymyz jıyrmada, balamyzdyń eń kishisi eki jastan endi asty. Bárimiz bir bólmede turyp jatyrmyz. Bul, ásirese, súıegi álsiz Ádilhanǵa qıyn», - dedi QazAqparat tilshisine Lázzat Ótepqalıeva.
Aıta ketsek, keshe QR Prezıdenti Qasym-Jomart Toqaev «Qazaqstan Respýblıkasy azamattarynyń qaryz júktemesin azaıtý týraly» Jarlyqqa qol qoıǵan bolatyn.
