Múgedek balasy bar adamdar Astana avtobýstarynda tegin júredi
ASTANA. QazAqparat - Astana qalasynyń ákimi Áset Isekeshev jolaqy úshin avtobýs kondýktorymen sózge kelgen múgedek balalardyń anasynyń shaǵymyna jaýap berdi, dep habarlaıdy QazAqparat tilshisi.
Qazirgi erejege sáıkes, 7 jasqa deıingi múgedek balany alyp júrgende ǵana asyraýshysy Astana avtobýstarymen tegin qatynaı alady.
«Biz kún saıyn kondýktorlarmen urysamyz, keıde arty janjalǵa ulasyp ketedi. Olar bizdiń kók kitapshamyzdy tartyp alady jáne jolaqy kartasyn talap etedi. Meniń eki múgedek balam bar, jeke kóligim joq, kún saıyn avtobýspen qatynaımyn. Jol júrý aqysy - 90 teńge. Tegin júrý úshin balamdy ózimmen alyp júrýim kerek pe?», - dedi qala turǵyny ákimniń halyqqa esep berý kezesýinde.
Qalalyq jumyspen qamtý basqarmasynyń basshysy Ermek Ospanov atalǵan máseleniń sheshilip jatqanyn, qarjylandyrýdyń júrgizilgenin aıtty. Qazir qujattar kásipkerler palatasynda qaralyp jatyr, sebebi bul sheshim shaǵyn jáne orta bıznes múddelerimen tyǵyz baılanysty kórinedi.
Óz kezeginde, Áset Isekeshev múgedek balalardyń asyraýshylary úshin jol júrý aqysyn tegin etý boıynsha tezirek sheshim qabyldaýdy tapsyrdy.
