Múgedek balanyń tabysy salyqtan tolyq bosatylady - B. Sultanov
ASTANA. Qazannyń 22-ci. QazAqparat /Qanat Mámetqazyuly/ - 2010 jyldan bastap ózi tabys tabatyn múgedek balanyń tabysy salyqtan tolyq bosatylady.
Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda Ekonomıka jáne bıýdjettik josparlaý mınıstri Baqyt Sultanov osylaı málim etti, dep habarlaıdy QazAqparat.
«Qujatta daǵdarys saldaryna baılanysty halyqtyń áleýmettik osal toptaryna járdem berý kózdelip otyr. Bul rette, Uly Otan soǵysyna qatysýshylarǵa, 1-shi, 2-shi jáne 3-shi toptaǵy múgedekterge, tyl eńbekkerlerine, múgedek balalardyń ata-analary nemese asyraýshylarynyń tabysyna salyq salynbaıtyn shek - eń tómengi jalaqynyń 55 ese mólsherine deıin ulǵaıady. Bul shek qazirgi qoldanysta eń tómengi jalaqynyń 45 ese mólsherinde bolatyn. Budan basqa, ózi tabys tabatyn múgedek balanyń tabysy da salyqtan tolyq bosatylady», dedi B. Sultanov.
Mınıstrdiń aıtýynsha, zań jobasymen salyq tóleýshilerge qolaıly jaǵdaı jasaý úshin birqatar jeńildikter usynylatyn bolady. Máselen, jeke tulǵalardyń kólik salyǵyn tóleý ýaqyty jeltoqsannyń 31-ne deıin uzartylady. Sonymen birge, zeınetaqy jarnalary men áleýmettik tólemder boıynsha salyq esebin berý ýaqytyn uzartý múmkindigi qarastyrylady. «Salyq organdarynyń memlekettik bajdy qaıtarý merzimi salyq pen tólemdi qaıtarý merzimi sekildi retteletin bolady.
Esterińizge sala keteıik, osy zań jobasyn Memleket basshysy jedel basymdyqpen qaraý týraly tapsyrma bergen bolatyn. Búgin Parlament Senaty atalǵan qujatty eki oqylymda qabyldap, Elbasynyń qol qoıýyna jiberdi.
