Múgedek balamdy baǵýdan bas tartqan emespin - Gúljanat Aldabergenova

 Ol «kókek ana» degen sóz ar-namysyna tıgenin jasyrmady, dep habarlaıdy QazAqparat tilshisi.

 Asylbek Ospanov pen Gúljanat Aldabergenova 2009 jyly otaý qurdy. Bir jyldan soń jas otbasy balaly boldy. Ata-anasy alǵashynda Janatbek Abdollanyń týa bitti múgedek bolǵanyn bilmegen, sezbegen. Dárigerler men bilikti mamandar tekserip, birneshe analız tapsyryp, basyna sý jınalǵan, isik bar, qan uıyǵan degen qorytyndy shyǵaryldy. Dereý aýrýhanaǵa jatqyzyldy, em júrgizildi. Bas súıeginiń ósýi tejelgen tusta ata-ana balaǵa týa bitti sal aýrýyna shaldyqqan degen qujattar jınady. Dál sol kezde Gúljanat Aldabergenova taǵy da júkti bolyp, ekinshi sábıin ómirge ákeldi. Rahat Abdolla da týa bitti sal aýrýymen dúnıe keldi. 2010, 2011 jyldary dúnıege kelgen balaryna em jasaý úshin erli-zaıypty páter jaldap turdy.

«Basyńa qıyndyq túskende bári qashyp ketedi. Árkimniń óz ómiri bar. Sol kezde meniń ata-anam qolushyn berip, aqylyn aıtty. Biz Aqtóbe oblysy, Muǵaljar aýdanyndaǵy meniń aýylyma baryp, birge turdyq. 5 jyl boıy ata-anamnyń janynda boldym. Ekologııalyq ahýal dep Atyraý oblysynda munaıshy bolyp jumys istep júrgen kúıeýimdi Aqtóbeniń Jańajol ken ornyna aýystyrdyq. Sol kezde páterge aqsha jınaýdy bastap, jańa kólikti nesıege satyp aldyq. Bári birqalypty boldy. Bir kúni otbasylyq janjaldan soń ol ketip qaldy. «Bala aýrý, múgedek» degen sózdi kúıeýimnen jıi estip, men de sharshap kettim. Óz erkimen júre almaıtyn, tamaqty qutymen ishetin balany baǵyp-qaǵý anaǵa da, ákege de qıyn. Oǵan tózdim»,- dedi Gúljanat Aldabergenova.

Keıin Asylbek Ospanov pen Gúljanat Aldabergenova ajyrasýǵa sheshim qabyldady. Sot otyrysy kezinde erli-zaıyptynyń nesıesi men bar múlki teń ekige bólindi. Eki balany ózine alǵan Gúljanat Aldabergenova keıin alıment óndirýdi jón sanady. Sol kezde Asylbek Ospanov bir balany ózi baǵýǵa sheshim qabyldap, ortaq kelisimnen soń týa bitti sal aýrýyna shaldyqqan Rahat Abdolla ákesiniń qamqorlyǵyna berildi. Sol kezde alıment óndirýge berilgen aryz keri qaıtaryldy.

«Burynǵy kúıeýimniń aıyptaýyn áleýmettik jeri arqyly oqydym. Ol «balamyzdy ınternatqa tapsyryp jibergen» dep jazyp, meni qaralady. Al men ulym Janatbekti «Jaına» ońaltý ortalyǵyna berdim. Bir jyl em qabyldaıdy, bizdiń qolymyzdan kelmegen kómekti dárigerler jasaıdy. Arnaıy ortalyqtyń qyzmetimen jiti tanysyp, 7 jastaǵy ulymdy mamandarǵa senip tapsyrdym. Sony estip, bilip, maǵan «sen tapsyryp jiberdiń» dep aıyptap otyr. Men qazir jumys istep, ortaq nesıemizdiń ózime tıesili bóligin tólep otyrmyn. Aqtóbe qalasynan úı alyp, ortalyqtaǵy medıtsınalyq kómekpen balama kútim jasaýdy armandaımyn. Jylap, úıimde otyrsam, eshkim qolyndaǵyny bermesi anyq. Sondyqtan qıyn da bolsa osy sheshimdi qabyldadym. Men apta saıyn poıyzben kelip, balamdy qaraımyn. Tárbıeshi, dárigerlermen telefon arqyly sóılesip, beınebaılanysqa shyǵamyn. Osyndaı jaǵdaıda burynǵy kúıeýim eldiń aldynda meni masqaralady. Endi negizsiz aıyptap, ar-namysyma tıgeni úshin sotqa beremin. Qajet bolsa eki balamdy ózime alyp, baǵamyn»,- dedi Gúljanat Aldabergenova.

Aıta keteıik, Gúljanat Aldabergenova orta arnaýly, joǵary oqý oryndaryn támamdaǵan. Ol joǵary oqý oryndarynda dene tárbıesi, pedagogıka mamandyqtaryn alyp shyqty. 2013 jyly balabaqshaǵa tárbıeshi bolyp jumysqa ornalasty.

«Ońaltý ortalyǵyna kelgen soń ulymnyń densaýlyǵy ózgerdi. Únemi aýzynan sý aǵyp júretin edi. Ol tyıyldy. Men úshin ol da qýanysh. Sál de bolsa jaqsy arnaǵa burylyp edi, el meni aıyptap, «kókek ana» dep tanı bastady. Telefon shalyp, áleýmettik jelidegi sózderdi jetkizgender kóp boldy. Bári meni negizsiz aıyptady. Balamnan bas tartpaımyn, ınternatqa tapsyrmaımyn. «Іshimnen shyqqan shubar jylan». Aýrý bolsa da men úshin bala. Ózim balabaqshada jumys isteımin. Ózgeniń balasyna tárbıe berip, óz balamdy óńmeninen ıtersem meniń kim bolǵanym? Ol júrmese de, kúlmese de, ana dep moınyma asylmasa da balam bar ómirim. Asylbek Ospanov jumystan shyǵyp, balaǵa beriletin járdemaqyny alyp otyrǵanymdy qalaıdy. Al balanyń emine ol aqsha jetpeıdi. Bulshyq etke arnalǵan 1 ekpe 150 myń teńge turady. Ol bala úshin kómek surasyn, biraq meni qaralamasyn»,- dedi G.Aldabergenova.

Gúljanat Aldabergenova múgedek bala týǵanyna uıalmaıtynyn, olarǵa qoldan keler bar kómekti beretinin aıtty.

«Balam aýrý dep jylap, jumyssyz júrsem, el músirkeıdi, biraq kómektespeıdi. Men «balam múgedek» dep aıtaýǵa arlanatyn, uıalatyn ata-anany da kórdim. Kúni-túni júgirip, uıyqtamaı ósirgen balalarymdy tastamaımyn. Adamdardyń oıy, sózi janyma batqan soń shyndyqty aıttym»,- dedi ol.