Múgedek balalardyń anasy Isekeshevke orynbasarynyń dóreki sóılegeni úshin aryzdandy
ASTANA. QazAqparat - Úsh balany, sonyń ishinde eki múgedek balany asyrap otyrǵan jalǵyzbasty ana Astana qalasy ákiminiń orynbasary dóreki sóıledi dep qala basshysy Áset Isekeshevke aryzdandy, dep habarlaıdy QazAqparat.
Shynar Janbekova - úsh balanyń anasy, onyń ekeýi múgedek. Joldasy eki balanyń múgedek bolǵanyna shydamaı, otbasyn tastap ketken eken. Soǵan qaramastan jalǵyzbasty ana jataqxanadan bir bólmeni jaldap, taǵdyrdyń ystyǵyna da, sýyǵyna da shydap kelgen. Jaqynda ol Astana qalasy ákiminiń orynbasary Andreı Lýkınnen kómek surap barǵan eken. Alaıda sheneýnik ony suraqtyń astyna ala tergep, aqyry kómek berýden bas tartqan. Áleýmettik jeli arqyly Áset Isekeshevke aryzdanǵan Shynar Janbekova oqıǵanyń mán-jaıyn baıandap bergen edi.
«Qurmetti Áset Órentaıuly, men - Janbekova Shynar Nuralıqyzy, úsh balanyń anasymyn. Úsh balamnyń ekeýi - týǵannan mýgedek. Qyzym - Aıdana, jasy 14-te, sal aýrýyna (DTsP) shaldyqqan, ulym - Jankeldi, jasy 9-da, sóıleý júıesi tejelgen. Balalardyń ákesi basymyzǵa túsken qıyndyqqa shydamaı, bizdi tastap ketken. Alımentti de tólemeıdi, basqa da kómek kórsetpeıdi. Bar aýyrtpashylyqty óz moınymmen, balalar úshin, balalardyń bolashaǵy úshin kóterip kelemin. Osy ýaqytqa deıin úkimetten aı saıyn beretin kómek aqysynan (posobıe po ınv.) basqa eshqandaı kómek kórgen emespin. Ózim otbasynyń jaǵdaıyna baılanysty turaqty bir jumysqa tura almaımyn. Óıtkeni balalaryma kúni boıy kútim kerek, tamaqtandyrý kerek, jórgegin aýystyrý kerek. Qyzyma muǵalimder keledi úıge. Ekinshi balamdy arnaıy mektepke aparyp, alyp kelem. Sol eki ortada ýaqyt taýyp, qolymnan kelgen jumystardy isteımin», - dep jazdy Shynar Janbekova.
Onyń sózine qaraǵanda, búginde ol jataqhanada bir bólmeni jaldap turady. Oǵan aı saıyn 60 000 teńge ketedi. Aıdanaǵa tólenetin járdemaqynyń bári soǵan jumsalady. Úsh balanyń ekeýi múgedek bolǵannan keıin jataqxanada turý qıyn. Sebebi ájetxanasy da, jýynatyn bólmesi de syrtta ornalasqan.
"Al kúnderdiń kúninde bólmeniń ıesi bosat dese, qaıda baramyn dep ýaıymdap qınalamyn. Osy oımen sizdiń orynbasaryńyz A.I.Lýkınniń qabyldaýynda boldym. 28.11.2016 j. saǵ 16:00-de kómek bolady degen úmitpenen kyzym Aıdanany birge ala bardym, biraq ol kisi kómek bermek túgili Astanaǵa ne úshin kóship keldiń? (Znaesh takıh kak ty skolko?) dep ózimdi balaǵattady. Sodan keıin «Sen qaı aımaqtan keldiń?» dep (Gde rodıtelı? Gde jıla ranshe v shkolnye gody?) dep suraqtyń astyna aldy. Ákem joq, sheshemniń óz otbasy bar dedim, marqum bolǵan ájemniń meniń kazirgi jeke ómirime kandaı katysy bar? Men sony túsinbedim. Osyndaı laýazymdy adam meni kemsitip, til tıgizip, ájýalap otyrǵany durys pa? Maǵan til tıgizip otyrǵandy kórip, jylap jibergen qyzyma Lýkın kóz qyryn salǵan da joq. "ıA otkazyvaıýs vam pomoch", - dep bizdi shyǵaryp saldy. Áset Órentaıuly! Sizdiń orynbasaryńyz A.I.Lýkınniń jalǵyzbasty úsh bala tárbıelep otyrǵan anaǵa til tıgizip, mazaq kylyp otyrýǵa qandaı qaqysy bar? Kezegim jaqyndap, úı alǵansha meni balalarymen dalaǵa qýyp shyqpas úshin ýaqytsha bolsa da baspana surap baryp edim, biraq Lýkınniń aıtqany da, kórsetkeni de osy boldy ma? Sonda bul kisiniń barlyq mindeti osy boldy ma? Qurmetti Áset Órentaıuly, meniń jan aıqaıyma jaýap berersiz dep úmittenem. Óıtkeni sizdiń aldyńyzǵa barýǵa jazylý múmkin emes", - dep jazady úsh balanyń anasy.
