Múgedek balalardy urǵan astanalyq tárbıeshige qatysty sot bastaldy

ASTANA. QazAqparat – Astanada «Balam-aı» múgedek balalardy áleýmettik qoldaý ortalyǵynda tárbıelenýshilerdi urǵan tárbıeshige qatysty sot bastaldy, dep habarlaıdy QazAqparat tilshisi.

Aıyptalýshy – 33 jastaǵy áıel. Onyń ózi múgedek. Sóılemeıdi, qulaǵy estimeıdi. Sot zalynda ol arnaıy sýrdoaýdarmashynyń kómegimen jaýap berip otyrdy. Biraq kúdikti ózine taǵylǵan aıyptardyń birin de moıyndamaıtynyn jetkizdi. Sondaı-aq ózderin túsirýge qarsylyq bildirdi. Sýdıa olardyń talaptaryn qanaǵattandyrdy.

Aıta keteıik, kúdiktiniń ústinen bastapqyda QR QK 140-baby boıynsha qylmystyq is qozǵalǵan bolatyn.

«Tergeý barysynda is QR QK 110 baby 2 tarmaǵy boıynsha qaıta saralandy. Bul bap boıynsha jaza 5 jylǵa deıin bas bostandyǵynan aıyrý nemese aıyppul qarastyrylǵan», - dedi jábirlenýshi taraptyń qorǵaýshysy Arjan Sádýaqas.

Esterińizge sala keteıik, ortalyqta beınebaqylaý kamerasyna túsken kadrlardaǵy jaıt kópshiliktiń jaǵasyn ustatty. Erekshe balalardy uryp-soǵý oqıǵasyn bas prokýror baqylaýyna alǵan bolatyn.