Múgedek balalardy tárbıelep otyrǵan otbasylarǵa qosymsha bólme bólinedi
Bul týraly Zań jobasyn QR Parlamenti Májilisinde tanystyrǵan QR Indýstrııa jáne ınfraqurylymdyq damý vıtse-mınıstri Erkebulan Daýylbaev málim etti.
«Joǵaryda aıtylǵandaı, turǵyn úı alý úshin qandaı da bir sanatqa jatatynyna qaramastan, turǵyn úıge muqtaj kez kelgen QR azamaty esepke tura alady.
Sondaı-aq, balalary kámeletke tolǵan ne olar qaıtys bolǵan jaǵdaıda, kóp balaly otbasylar jáne tolyq emes otbasylar úshin kezektilikti saqtaý jónindegi sharalar kózdelgen.
Soltústik óńirlerge qonys aýdarǵan jaǵdaıda qandastar kezekten shyǵarylmaıtyn bolady. Memlekettik nemese qoǵamdyq mindetterdi oryndaý, sondaı-aq, adam ómirin qutqarý kezinde qaza tapqan azamattardy qurmetteý maqsatynda, osyndaı adamdardyń otbasylaryn jergilikti atqarýshy organdarmen 1 jyldan keshiktirmeı turǵyn úımen qamtamasyz etý usynylady», - dedi Erkebulan Daýylbaev.
Al múgedek balalardy tárbıelep otyrǵan otbasylar úshin turǵyn úıdi bólý kezinde qosymsha bólme bólý kózdelgen.
«Otbasy bankine» kezekte turǵandar bazasyn júrgizý boıynsha memlekettik fýnktsııalardy berýge baılanysty derbes derekterdiń qaýipsizdigi máselesi týyndaıdy.
Osyǵan baılanysty kezekte turǵandardyń derbes derekteriniń saqtalýy, qaýipsizdigi jáne qorǵalýy Qazaqstan Respýblıkasynyń zańnamalyq aktilerine sáıkes júzege asyrylatyn bolady.
Kezektilikti esepke alý úshin «Otbasy banki» ázirleıtin aqparattyq júıe memlekettik tehnıkalyq qyzmette jyl saıynǵy attestattaýdan jáne synaqtan ótetin bolady.
Derbes derekterdi jınaýǵa jáne óńdeýge kelisim zańnamaǵa jáne Tsıfrlyq damý, ınnovatsııalar jáne aeroǵarysh ónerkásibi mınıstrliginiń «Derbes derekterge qoljetimdilikti baqylaý servısine» sáıkes turǵyn úıge muqtaj azamattarmen usynylatyn bolady», - dedi vıtse-mınıstr.
