Múgedek balalardy tárbıelep otyrǵan 9 otbasyǵa Astana kúninde jınalǵan qarajattan kómek kórsetildi
ASTANA. 12 shilde. QazAqparat - Astana qalasynyń ákimdiginde múgedek balalardy tárbıeleıtin otbasylarǵa aqshalaı sertıfıkattardy tapsyrý boıynsha dástúrli jyl saıynǵy qaıyrymdylyq aktsııasy ótti.
Bul qarajat Astana kúni aıasynda ótkizilgen kontsertter men qaıyrymdylyq aktsııalarynan jınalǵan bolatyn. Bul jyly komıssııa qarjyny tez arada emdelýdi qajet etetin múgedek balalary bar 9 otbasyǵa bólip berdi.
«Biz Astana kúnderinde kontsertter men merekelik sharalarǵa barǵan barlyq astanalyqtar men elorda qonaqtaryna alǵysymyzdy bildiremiz. Sebebi olar tek kontsert tamashalap qana qoımaı, sonymen qatar, múmkindigi shekteýli qanshama búldirshinderdiń úmit otyn jaǵýǵa atsalysty», - dep atap ótti Astana qalasynyń jumyspen qamtý jáne áleýmettik baǵdarlamalar basqarmasynyń basshysy Alma Altybaeva.
Bul aktsııa 2008 jyldan beri ótkizilip keledi. Bıylǵy Astana kúninde 7,5 mln. teńge jınaldy.
