Múgedek balalar oqıtyn mektepterge «Almaty marafony» syılyq jasady

ALMATY. QazAqparat - «Almaty marafony» megapolıstegi 2 mektep-ınternatqa quzǵa órmeleý quraly men birqatar sport buıymdaryn syıǵa tartty, dep habarlaıdy QazAqparat tilshisi «Almaty marafonynyń» uıymdastyrýshylaryna silteme jasaı otyryp.

VI «Almaty marafonyna» qatysýshylar atynan «Smelost byt pervym» korporatıvtik qorynyń basshylyǵy men «World Class Almaty» fıtnes klýby 2017 jylǵa arnalǵan aýqymdy qaıyrymdylyq sharasy aıasynda eki balalar úıine birqatar sport buıymdaryn syıǵa tartty.  

«Sóıleý qabileti tómen balalarǵa arnalǵan №9 arnaıy mektep-ınternatynda quzǵa órmeleý nysany ashyldy. Bul nysan «Almaty marafonyna» qatysýshylar tólegen jarnaǵa salynǵan. Atalǵan mektepte 350 bala bilim alyp jatyr, olardyń 100-i múgedek.

«Biz birinshiden, 23sáýir kúni «Almaty marafonyna» qatysý úshin júgirýge shyqqandarǵa alǵys aıtamyz. Densaýlyǵy nashar balalar úshin salynǵan, satyp alynǵan sport quraldarynyń barlyǵy - bizdiń ortaq eńbegimiz», - dedi «Smelost byt pervym» qorynyń atqarýshy dırektory Saltanat Qazybaeva.

Sonymen qatar, qımyl qozǵalys áreketi buzylǵan balalar oqıtyn №2 ınternatqa emdik, dene shynyqtyrýmen sport oıyndary, qurastyrý oıynshyqtary syıǵa tartý etildi.    

«Almaty marafonynń» 2017 jylǵa arnalǵan qaıyrymdylyq sharalary qyrkúıek aıynyń sońyna deıin jalǵasady. Aı sońyna deıin eki mektep-ınternat pen bir balabaqshaǵa kómek kórsetiledi.

Eske sala keteıik, almatylyqtar marafonǵa qatysý úshin 2 000 - 4 000 teńge aralyǵynda jarna tólegen. 6-shy ret ótkizilip otyrǵan Almaty marafonyna 13 myń adam qatysqan.  
«Kelesi jyly, 2018 jyldyń 22 sáýirinde kezekti marafondy uıymdastyrý josparlanyp otyr. Bıylǵy qaıyrymdylyq aktsııasy aıasynda 6 mektep-ınternatqa jınalǵan jarnadan 13,5 mln teńge bólindi», -dedi marafonnyń PR menedjeri Ásel Bejenova.