Múgedek balalar bilim berýmen tolyq qamtylmaı otyr - Z. Balıeva
ASTANA. QazAqparat - QR Parlamenti Májilisiniń depýtaty Zaǵıpa Balıeva Astanada Qazaqstan xalqy Assambleıasy respýblıkalyq Analar keńesiniń otyrysynda múmkindigi shekteýli balalardy bilimmen qamtý máselesin kóterdi.
"Úlken ókinishke oraı, balalardyń barlyǵy birdeı joǵary ómir sapasyna qajetti quqyqtaryn paıdalanbaı otyr. Mysaly, 140 581 múmkindigi shekteýli balanyń 61 959-y ınklıýzıvti bilim alýda. Qalǵandary ne istep jatyr? Qalǵandaryna muǵalimder úıine keledi, keıde kelmeıdi de. Eger kelse de, az ýaqyt oqytady. Sondaı balalardyń ata-analarymen kezdeskende osyny jıi estımin", - deıdi Z. Balıeva.
Onyń aıtýynsha, bizdiń elde mundaı balalarǵa jetkilikti dárejede kóńil bólinbeı keledi.
"Biz olardyń óz Otandarynyń tolyqqandy azamaty bolyp qalyptasýyna mardymdy kóńil bólmeı kele jatyrmyz", - dep atap ótti ol.
