Múgedek bala asyrap otyrǵan ata-analar járdemaqysy 30 paıyzǵa artady

ASTANA. QazAqparat - Memleket basshysy Nursultan Nazarbaev múgedek balalardy asyrap otyrǵan ata-analardyń járdemaqysyn arttyrýdy tapsyrdy, dep habarlaıdy QazAqparat tilshisi.

«Úkimetke múgedek balalardy asyrap otyrǵan ata-analardyń járdemaqysyn 30 paıyzǵa kóbeıtýdi tapsyramyn. Bizdiń esebimizge sáıkes, osynyń arqasynda 100 myń adamnyń járdemaqysy ósedi. Osy maqsatta 2019-2021 jyldary qosymsha 300 mıllıard teńgeni bólip berýimiz kerek», - dedi N.Nazarbaev «Nur Otan» partııasynyń XVIII sezinde.

Prezıdenttiń aıtýynsha, eńbekke jaramdy azamattardy jumysqa tartý qajet. Búginde úıde otyryp ta tabys tabýǵa bolady.

«Jergilikti bıýdjet esebinen de kómek berýdi kúsheıtý kerek. Ondaı múmkindikter bar. Qarjyny únemdep, qajet jerge jumsaý qajet. Ótken jyly jergilikti bıýdjetterdiń esebinen 135 mıllırd teńge kómek berildi. Osyndaı kómekti jalǵastyrý qajet», - dep atap kórsetti N.Nazarbaev.

Aıta keteıik, bıyl «Nur Otan» partııasynyń qurylǵanyna 20 jyl tolyp otyr. Osy ýaqytqa deıin respýblıka boıynsha 1 mıllıonnan astam adamǵa partııa bıletteri tabystaldy. Uıymǵa múshe azamattardyń 62 paıyzy - áıelder. Al 29-40 jas aralyǵyndaǵy múshelerdiń sany 27 paıyzdy quraıdy.