Múgedek azamatqa qaraqshylyq shabýyl jasaǵan 2 buzaqy qolǵa tústi

dep habarlady Soltústik Qazaqstan oblystyq ІІD baspasóz qyzmeti.

Vedomstvonyń atap ótýinshe, oqıǵa Soltústik Qazaqstan oblysy Aqqaıyń aýdanynyń Qııaly aýylynda oryn alǵan. Qas qaraıǵan kezde eki belgisiz adam ІІ toptaǵy múgedektiń úıiniń esigin buzyp kirip, ony qoldaryndaǵy temirmen jáne taıaqpen soqqynyń astyna alady. Olar jábirlenýshiden barlyq aqshasyn berýdi talap etip, úı ishindegi zattardyń astan-kestenin shyǵarady. Temir súımenmen komod esigin syndyryp ashqan buzaqylar aqsha jáne úı ıesiniń uıaly telefonyn oljalap oqıǵa ornynan boı tasalaıdy. Jábirlenýshiniń aıtýynsha, qaraqshylar úıde bolǵan 400 myń teńgeni alyp ketken. Basy jarylǵan er adam bolǵan oqıǵa jaıly óziniń áleýmettik kómekshisi arqyly ýchaskelik polıtsııa ınspektoryna habarlaıdy.

«Oqıǵa ornyna shyqqan Aqqaıyń aýdandyq ishki ister bóliminiń jedel tergeý toby birden qylmyskerlerdi izdestirý sharalaryn júrgize bastady. Aýyldan shyǵatyn joldarda beketter qoıylyp, jedel ýákilder jábirlenýshiniń kómegimen qaraqshylardyń bet álpetin, kıgen kıimderin anyqtap, olardyń aýyzsha portretterin jasady. Іzdestirý sharalaryn júrgizý barysynda bul qylmysqa atalǵan eldi mekenniń eki turǵyny qatysty bolýy múmkin degen boljam jasaldy. Bir táýlikten keıin kúdiktiler aýyldaǵy úılerdiń biriniń qorasynda, polıtsııadan tyǵylyp jatqan jerlerinde ustaldy», - delingen baspasóz habarlamasynda.

Kúdiktilerdiń ekeýi de Qııaly aýylynyń 27 jastaǵy turǵyndary bolyp shyqty. Olardyń biri buǵan deıin avtokólik urlaǵany úshin sottalyp, jazasyn bir aı buryn ǵana ótep shyqqan. Ustalǵandar qylmys jasaǵandaryn birden moıyndap, shabýylǵa aldyn ala daıyndalǵandaryn aıtyp otyr. Qylmys jasaǵannan keıin kúdiktiler taksımen oblys aýmaǵynan shyǵyp ketpekshi bolǵan. Biraq jol polıtsııasynyń avtokólikterin kórgen jigitter seloǵa qaıta oralyp, úıýli turǵan shóp arasynda jasyrynǵan.

«Qazirgi kezde kúdiktilerdiń ekeýi de qamaýǵa alynyp, 60 jastaǵy jábirlenýshi aýdandyq aýrýhanada emdelýde. Qaraqshylyq shabýyl faktisi boıynsha qylmystyq is qozǵaldy», - delingen vedomstvo aqparatynda.