Múgedegi bar otbasyndaǵy jalǵyz er balany áskerge shaqyrý keıinge qaldyrylatyn bolady
Eske sala keteıik, jalpy otyrysta «Qazaqstan Respýblıkasynyń keıbir zańnamalyq aktilerine múgedekterdiń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqylanǵan bolatyn.
Mınıstrdiń aıtýynsha, atalǵan zań jobasy múmkindigi shekteýli azamattardyń áleýmettik qorǵaý júıesin jetildirý boıynsha birneshe baǵyttardy qamtıdy. Onyń ishinde kólik ınfraqurylymynyń qoljetimdiligin arttyrý, áleýmettik sala qyzmetterin jaqsartý, aqparat pen turǵyn úıge qoljetimdiligin arttyrý, sonymen birge quqyqtyq kómekti jetildirý qamtamasyz etiledi.
«Máselen, zań jobasymen múmkindigi shekteýli azamattar úshin kólik ınfraqurylymynyń qoljetimdiligin arttyrý maqsatynda vokzaldar men áýejaılarda kedergisiz ortalyq qurý, temirjol quramdaryn múgedekter úshin qoljetimdi vagondarmen jabdyqtaý, qoǵamdyq oryndar men dańǵyldarda, kóshelerde kólik quryldaryn qoıýǵa bolmaıtyn oryndarǵa múgedekter úshin kólik avtoturaǵyn bólý qarastyrylady. Budan bólek, qurylys salý qaǵıdalarynda, ınjenerlik ınfraqurylymdar aýmaqtarynda múgedekter úshin qoljetimdilikti qamtamasyz etý talaptaryn mindetti túrde eskeriletin bolady», - dedi mınıstr Tamara Dúısenova.
Onyń aıtýynsha, áleýmettik sala boıynsha bilim berý salasynda qoldanystaǵy ınklıýzıvti bilim berý bilim berý qaǵıdatyn eskere otyryp, bilim berýdiń jalpyǵa mindetti standarttaryn ázirleý qarastyrylady. Sonymen qatar, psıhologııalyq kabınetter keńeıtilip, múmkindigi shekteýli balalardyń keńinen bilim alýy qamtamasyz etilmek.
«Turǵyn úıge qoljetimdilikti qamtamasyz etý maqsatynda tirek-qımyl apparaty buzylǵan múgedekterge beriletin baspana páteriniń ekinshi qabattan joǵary bolmaýy, basqa baspana bermesten úshinshi top múgedekterin qyzmettik turǵyn úıden shyǵarýǵa jol bermeý qarastyrylyp otyr. Al quqyqtyq kómekti jetildirý maqsatynda múgedegi bar otbasyndaǵy jalǵyz er balany áskerı qyzmetke shaqyrýdy keıinge qaldyrý kózdeldi. Sonymen qatar, júrip-turý qıyndyǵyna baılanysty múgedektik jaǵdaıda neke qııýdyń memlekettik tirkelimin úıde, medıtsınalyq nemese ózge de uıymda júrgizý qamtylady», - dedi T. Dúısenova.