Muǵalimniń artyq júktemesin azaıtý qajet – Prezıdent
ASTANA. KAZINFORM — Ustazdyń oqýshylarǵa bilim berýine kedergi keltiretin basy artyq jumystardy doǵarý kerek. Bul jóninde Qazaqstan halqyna Joldaýyn jarııalaý kezinde Prezıdent Qasym-Jomart Toqaev málimdedi.
Memleket basshysy qoǵamda oqý-aǵartý salasyndaǵy reformalarǵa qatysty túıtkilder kóp talqylanyp júrgenin atap ótti.
– Ár ózgeris muǵalimniń jumysyn jeńildetýge, onyń qyzmetindegi artyq júktemeni azaıtýǵa baǵyttalýy kerek. Іs júzinde bul mindet tolyq oryndalmaı jatqany jasyryn emes. Buryn qaǵazbastylyq kóp edi. Endi onyń ornyn túrli platformalarǵa, tsıfrlyq júıelerge engizilýge tıis esepter basyp otyr. Ustazdyń negizgi mıssııasy – balaǵa sapaly bilim berý, ıaǵnı saýatty, sanaly urpaq tárbıeleý. Bul mindetterdi oryndaýǵa kedergi keltiretin basy artyq jumysty doǵarý kerek. Biz muǵalimderdiń abyroı-bedelin qorǵaýymyz qajet. Sońǵy ýaqytta mektepterde oqýshylar ustazdaryna dóreki sóılep, tipti, kúsh qoldanatyn jaǵdaılar da az emes. Mundaı kezde kóbinese mektep ákimshiligi de muǵalimge qysym kórsetip jatady. Bul – durys emes, – dedi ol.
Prezıdenttiń sózinshe, ár másele muqııat ári jan-jaqty qaralýǵa tıis. Kez kelgen jaǵdaıǵa otbasy da, oqýshy da, ustaz da, mektep te – bári de birdeı jaýapkershilikpen qaraýy kerek. Al Oqý-aǵartý mınıstrligi bul jumysty jiti nazarda ustaýy qajet.
Aıta keteıik, buǵan deıin Prezıdent jańa Salyq kodeksindegi qaıshylyqtardy joıý qajettigin málimdegen edi.
