Muǵalimnen mashına qurastyrý sheberine deıin: erler kásibin ıgergen áıeldiń tabys joly
QARAǴANDY. KAZINFORM — Metall men mehanızmderdiń kúrdeli áleminde áıeldiń etene aralys ketýi áli de sırek kezdesedi. Alaıda Qarmet kompanııasynyń «Qurylysmet» kásipornynda eńbek etetin Juldyz Qapysh bul túsinikti túbegeıli ózgertip otyr. Ol mashına qurastyrý salasynda názik jandylar da kásibı jetistikke jete alatynyn dáleldep, óz isiniń sheberine aınaldy.
Qarmet kompanııasynyń enshiles kásiporny — «Qurylysmet» JShS-niń tsehynda stanoktardyń yrǵaǵy úzilmeıdi. Temirdiń tarsyly men dánekerleý kezindegi ushqynnyń arasynda eńbek etip júrgenderdiń arasynda bir áıeldiń beınesi erekshe kózge túsedi. Bul — stanok jáne slesarlyq jumystardyń sapasyn baqylaıtyn maman Juldyz Qapysh. Onyń jumys kúni temir-tersek, naqty ólshemder jáne ár bólshektiń sapasyn qadaǵalaýmen ótedi. Sebebi shahta jabdyǵynyń senimdiligi osy baqylaýdan bastalady.
Juldyz buryn kolledjde muǵalim bolyp eńbek etken. Sabaq berip, stýdenttermen jumys istep júrgende óndiristegi ómirdi tipti elestetpegen. Biraq ýaqyt óte kele, ózin jańa salada synap kórgisi kelgen.
— Áýelde, árıne, qorqynysh boldy. Barlyǵy beıtanys, aınala shý, jańa erejeler. Biraq ózime: «Qoryqpa, baıqap kór» dedim de, sheshim qabyldadym. Eń bastysy — isti súıip, shyn kóńilmen atqarý. Sonda eshqandaı jumys aýyr bolyp sezilmeıdi, — dep eske alady Juldyz.
Mashına qurastyrý salasy dástúrli túrde «erler isi» sanalyp keldi. Munda fızıkalyq kúsh, tehnıkalyq oılaý men tabandylyq qajet. Alaıda Juldyz bul salada názik jannyń da óz ornyn taba alatynyn dáleldep júr. Búginde onyń osy baǵyttaǵy eńbek ótili bes jylǵa jýyqtady. Ol daıyn ónimniń sapasyn tekserip, tehnologııalyq protsesterdiń durys oryndalýyn baqylaıdy.
— Meniń isime muqııat bolýym men jaýapkershiligim shahta jabdyqtarynyń qanshalyqty uzaq qyzmet etetinine tikeleı áser etedi. Sol sebepti ár bólshekti qarap shyǵýda barynsha dál bolýǵa tyrysamyn, — deıdi ol.
Áriptesteri onyń eńbekqorlyǵyn erekshe baǵalaıdy.
— Názik qyzdyń osyndaı kúrdeli jáne aýyr salada óz ornyn tabýy — maqtaýǵa turarlyq. Juldyz az ýaqyt ishinde kásibı turǵyda ósip, úzdik mamandar qatarynan kórindi. Biz mundaı yntaly qyzmetkerlerdi árdaıym qoldap, damytýǵa kúsh salamyz, — deıdi «Qurylysmet» JShS dırektorynyń orynbasary Vıtalıı Kolesnıkov.
Qazir Juldyz eki balanyń anasy. Ata-anasy ustaz bolǵan, al ol óz áýletindegi alǵashqy óndiris mamany.
— Maǵan balalarymnyń áıeldiń de myqty, derbes jáne óz isin jaqsy kóretin adam bola alatynyn kórýi mańyzdy. Eger adam óz isin súıse, kez kelgen salada jetistikke jetedi, — deıdi ol.
«Qurylysmet» kásipornynda búginde 1500-den astam adam eńbek etedi. Olardyń arasynda tokarlar, frezerleýshiler, dánekerleýshiler, ınjenerler men sheberler bar. Bul úlken komanda mashına qurastyrý óndirisiniń ár satysynda eńbek etip, Qarmet kompanııasynyń ındýstrııalyq bazasyn qamtamasyz etedi. Kásiporynnyń ónimderiniń 90 paıyzy Kómir departamentine baǵyttalady — negizinen shahtalarǵa arnalǵan jabdyqtar men qosalqy bólshekter shyǵarylady. Sonymen qatar Bolat departamentimen de birlesken jobalar júzege asyp jatyr.
Tsehtarda jasalatyn árbir bólshek pen metall qurylymy shahtalardyń úzdiksiz jumysyn qamtamasyz etedi. Ár buranda, ár dánekerlengen tigis — eńbekqor mamandardyń jaýapkershiligi men sheberliginiń kórinisi. Osyndaı eńbektiń artynda Juldyz Qapysh sııaqty óz isine adal, muqııat ári tabandy jandar tur.
— Eń bastysy — ózińe sený. Eger isti shyn júrekpen súıseń, eńbegiń de, nátıjeń de soǵan saı bolady, — deıdi ol kúlimdep.
Juldyz Qapysh búginde mashına qurastyrý salasyndaǵy áıelder beınesin jańasha qalyptastyryp keledi. Ol óz úlgisimen: stanok basyndaǵy eńbek bul kúshtiń emes, minez ben kásibı rýhtyń isi ekenin aıqyn kórsetti.