Muǵalimnen kásipkerge deıin: qazaqstandyq maman AI men robototehnıka jobasyn qalaı damytyp júr
ASTANA. KAZINFORM — Jasandy ıntellekt pen robototehnıka búginde bilim berý salasynyń da mańyzdy bóligine aınalyp keledi. Qazaqstanda osy baǵytta oqýshylarǵa arnalǵan tehnologııalyq jobalar jasap, otandyq ónimdi damytýǵa kúsh salyp júrgen mamandardyń biri — CYBERPACK.AI jáne Rolab Academy jobalarynyń negizin qalaýshy Sabyrjan Mustafın. Ol eńbek jolyn ınformatıka muǵalimi retinde bastap, keıin robototehnıka salasyndaǵy tájirıbesin kásipkerlikpen ushtastyrǵan.
Sabyrjan Mustafın Pavlodar oblysynyń Moıyldy aýylynda dúnıege kelgen. Onyń robototehnıkaǵa qyzyǵýshylyǵy Nazarbaev Zııatkerlik mektebinde oqyp júrgen kezinde oıanǵan. Mektepte robototehnıka kabıneti ashylyp, oqýshylarǵa demalys kúnderi de ǵylymı-zertteý jumystarymen aınalysýǵa múmkindik berilgen.
Almatydaǵy mektepte muǵalim bolyp jumys istegen jyldary Sabyrjan Mustafın oqýshylardy robototehnıka jarystaryna daıyndady. Onyń aıtýynsha, osy kezeńde 100-den astam jarysqa qatysyp, shákirtterimen birge joǵary nátıjelerge qol jetkizgen. Bul tájirıbe onyń bilim berý salasynda kásip bastaýyna túrtki boldy.
Keıin ol jeke mekteptermen jumys istep, robototehnıka, tehnologııa, ınjenerııa jáne STEM baǵyttary boıynsha muǵalimder daıarlap, mektepterde úıirmeler ashqan. Osy kezde joǵary synyp oqýshylaryna arnalǵan robototehnıka sabaqtarynda jańa tásil qajet ekeni baıqalǵan.
— Joǵary synyptarǵa kelgende LEGO jınaqtary balalarǵa qyzyqsyz bola bastady. Sabaqqa qyzyqtyrý qıyndady. Otandyq óndiris ashý jaıly kóp usynys tústi. Osy máseleni sheshý úshin CYBERPACK.AI júıesin qurastyrdyq, — dedi ol Jibek Joly telearnasyndaǵy «Búgin.LIVE» baǵdarlamasynda.
Osylaısha CYBERPACK.AI jobasy paıda bolǵan. Onyń ereksheligi — joba tek robototehnıka jınaqtarymen shektelmeı, muǵalimderge arnalǵan ádistemelik jáne tehnıkalyq qoldaýdy, jasandy ıntellekt pen STEM baǵytyndaǵy oqytýdy bir júıege biriktiredi.
Joba aıasynda mektepterge Cyberpack Junior jáne Cyberpack Senior jınaqtary usynylady. Kásipkerdiń aıtýynsha, olar Qazaqstanda óndiriledi. Jınaqtardy paıdalana otyryp, oqýshylar túrli pánder boıynsha ǵylymı-zertteý jumystaryn júrgizip, robototehnıka jarystaryna daıyndala alady. Sonymen qatar muǵalimder keıbir bólshekterdi 3D-prınter arqyly ózderi shyǵara alady.
Platformada robototehnıka men jasandy ıntellektke qatysty jarystarǵa daıyndalýǵa arnalǵan materıaldar bar. Oqýshylarǵa mobıldi qosymsha da ázirlengen. Onda olar oıyndar oınap, baǵdarlamalaý men AI baǵytynda tapsyrmalar oryndap, jarystarǵa tirkelip, upaı jınaı alady.
Sabyrjan Mustafınniń aıtýynsha, endi jobanyń taǵy bir baǵyty — Rolab Academy arqyly balalardy onlaın oqytý. Bul modelde oqýshynyń úıine robototehnıka jınaǵy men 3D-prınter berilip, oǵan muǵalim men kýrator bekitiledi. Bir jyl kóleminde bala ǵylymı-zertteý jumysyn jasap, jarystarǵa daıyndalady.
Qazir Rolab Academy-de onlaın jáne oflaın formatta oqytý júrgiziledi. Sabaqtar qazaq, orys jáne aǵylshyn tilderinde ótedi. Onlaın baǵdarlamaǵa Qazaqstannan bólek, sheteldegi oqýshylar da qatysady.
Jobanyń damýyna ınvestıtsııalyq qoldaý da áser etken. Sabyrjan Mustafınniń aıtýynsha, CYBERPACK.AI jobasy Astana Hub uıymdastyrǵan baǵdarlamalarǵa qatysyp, Ortalyq Azııadaǵy úzdik startaptardyń qataryna engen. Keıin jobaǵa jeke ınvestorlardan qarjy tartylǵan.
Onyń aıtýynsha, tehnologııalyq kásipkerlikke kelgendegi basty maqsattarynyń biri — Qazaqstanda balalardyń tehnologııaǵa qyzyǵýshylyǵyn arttyratyn otandyq ónim qalyptastyrý.
Búginde jasandy ıntellekt pen robototehnıkanyń bilim berý júıesine enýi jańa mamandyqtar men jańa oqytý tásilderine jol ashyp otyr. Al muǵalimdik tájirıbesin kásipkerlikpen ushtastyrǵan Sabyrjan Mustafın úshin bul baǵyt oqýshylarǵa tehnologııany úıretýmen qatar, olardyń óz ıdeıalaryn naqty jobaǵa aınaldyrýyna múmkindik beretin orta qalyptastyrýǵa negiz bolyp otyr.
Aıta keteıik, buǵan deıin, zaýyttaǵy jasandy ıntellektiniń bolashaǵy jaıly jazǵan edik.
