Muǵalimdikke kandıdattardy baǵalaý rásimi naqtylanady
ASTANA. KAZINFORM – Muǵalimdikke kandıdattardy baǵalaý rásimi naqtylanady. Bul týraly Májilis depýtattarynyń saýalyna Premer-mınıstrdiń orynbasary – Mádenıet jáne aqparat mınıstri Aıda Balaevanyń jaýabynda aıtylǵan.
– 2016 jyldan bastap engizilgen pedagogterdi baǵalaý júıesi memlekettik bilim berý saıasatyna sáıkes kezeń-kezeńimen jetildirilip keledi. Pedagogterdi attestattaýdy uıymdastyrý jáne ótkizý qaǵıdalaryna kásibı standarttar men pedagogterdiń biliktilik sıpattamalaryna talaptardyń kúsheıtý bóliginde ózgerister engizildi. Bul ózgerister pedagogterdiń ádistemelik materıaldardy ázirleýdegi kásibılik deńgeıin, pedagogıkalyq sheberlikti taratýyn jáne kásibı qoǵamdastyqtarǵa tartylý belsendiligin aıqyndaý qajettiligimen negizdeledi, - dedi ol.
Vıtse-premerdiń atap ótýinshe, pedagogterdi attestattaý rásimi aıasynda praktıkalyq pedagogıkalyq sheberlikti baǵalaý quraly retinde sabaqtardy baqylaý engizildi. Árbir pedagog jyl saıyn portfolıosyna keminde 5 sabaqtyń baqylaý paraqtaryn tirkeıdi. Sondaı-aq sabaqtarǵa baqylaý júrgizý úshin mobıldi qosymsha ázirlenip, paıdalanylyp jatyr. Pedagogterdiń «Ustaz» ulttyq platformasy arqyly ótkizilgen barlyq sabaqtardyń baǵalaý krıterıılerimen jáne nátıjelerimen tanysýǵa múmkindigi bar.
– Memlekettik bilim berý uıymdarynyń pedagogterin qyzmetke taǵaıyndaý jáne qyzmetten bosatý Memlekettik bilim berý uıymdarynyń birinshi basshylaryn jáne pedagogterin qyzmetke taǵaıyndaý, qyzmetten bosatý qaǵıdalarymen retteledi. 2022 jyldan bastap pedagogterdi jumysqa qabyldaý konkýrstyq negizde júzege asyrylyp jatyr. 2024 jylǵy 1 sáýirden bastap Oqý-aǵartý mınıstrligi Ulttyq bilim berý derekter bazasynda «Pedagogterdi jumysqa qabyldaý» jańa modýlin (budan ári – modýl) iske qosty. Modýl konkýrstyq rásimdi tolyq avtomattandyryp, bos oryndardy izdeý jáne ótinim berý úderisin edáýir jeńildetti. Árbir pedagog https://hr.nobd.edu.kz siltemesi arqyly modýlde tirkelip, ashyq vakansııalarmen tanysyp, bos nemese ýaqytsha bos laýazymǵa ornalasý úshin qujattaryn usyna alady, - dedi vıtse-premer.
Onyń aıtýynsha, qazirgi ýaqytta mınıstrlik qyzmetke taǵaıyndaý qaǵıdalaryna memlekettik bilim berý uıymdarynyń bos nemese ýaqytsha bos laýazymyna konkýrsqa qatysý úshin pedagogterdiń qujattaryn qabyldaý jónindegi memlekettik qyzmetti engizý, kandıdattardy baǵalaý rásimin naqtylaý bóliginde ózgeristerdi pysyqtap jatyr.
– Bul túzetýler konkýrsqa qatysý úshin pedagogterdiń qujattaryn qabyldaý rásiminiń ashyqtyǵy men tıimdiligin arttyrýǵa, basqarýshylyq úderisterdi ońaılatýǵa jáne adamı faktordyń yqpalyn azaıtýǵa baǵyttalǵan, - dedi Aıda Balaeva.
Buǵan deıin pedagogterdiń biliktiligin arttyrý uıymdaryna oqytý nátıjeleri úshin jaýapkershilik engiziletinin jazǵan edik.