Muǵalimderge túrli is-sharalardan vıdeo túsirtkizýdi doǵarý kerek — depýtat
ASTANA. KAZINFORM — Muǵalimderge kedergi keltiretin basy artyq jumystardy doǵarýǵa qatysty zańnamalyq sheshim bolady. Bul týraly Quryltaı depýtaty Ashat Aımaǵambetov málim etti.
— Máselen, muǵalimderge mektepte ótetin túrli is-sharalardy nemese sabaqty vıdeoǵa túsirip, reels-ter jarııalaýǵa májbúrleıtin kezder bolady. Buǵan da kóp ýaqyt ketedi. Sondyqtan osy tektes qyzmetinen tys jumystardy júkteý durys emes. Buǵan qosa eseptilik máselesi bar. Qazir túrli aqparattyq júıeler paıda bolyp jatyr. Bul rette synyp jetekshilerine, muǵalimderge, mektep dırektorlaryna, psıhologterge kóptegen aqparattyq júıedegi eseptilikti toltyrtqyzý problemasy baıqalyp otyr, — dedi Ashat Aımaǵambetov Quryltaıda Memleket basshysynyń Joldaýynan keıin.
Osy oraıda depýtat qazir Prezıdent muǵalimderdi artyq júktemeden bosatý máselesine erekshe mán berip otyrǵanyn aıtty.
— Keıingi jeti jylda Memleket basshysy muǵalimderge qatysty aýqymdy qoldaý jasap keledi. Búgingi Joldaýda bul taqyryp taǵy da qozǵaldy. Qazir biz daıarlaǵan zań jobasy aıasynda Prezıdent júktegen mindetter júzege asyrylady dep oılaımyn, — dedi Ashat Aımaǵambetov.
Aıta keteıik, Qazaqstan halqyna Joldaýyn jarııalaý kezinde Prezıdent Qasym-Jomart Toqaev ustazdyń oqýshylarǵa bilim berýine kedergi keltiretin basy artyq jumystardy doǵarý kerek ekenin tapsyrdy.
