Muǵalimderge mindetti qujattar sany 25-ten 5-ke deıin qysqarady
ASTANA. KAZINFORM – Qazaqstanda pedagogter júrgizýge mindetti qujattar tizimin 25-ten 5-ke deıin qysqartý josparlanyp otyr. Bul týraly Oqý-aǵartý mınıstri Juldyz Súleımenova Úkimet otyrysynda baıandady.
Mınıstrdiń aıtýynsha, pedagogterdiń kásibı qyzmetine qatysy joq júktemeni azaıtý jáne olardyń qoǵamdaǵy mártebesin nyǵaıtý – ózekti máselelerdiń biri.
2020 jyly №130 buıryqpen bilim berý uıymdarynyń pedagogteri júrgizýge mindetti 25 qujattyń tizimi bekitilgen. Endi Memleket basshysynyń tapsyrmasyna sáıkes, muǵalimderdi artyq eseptilikten aryltý maqsatynda bul tizimdi bes qujatqa deıin qysqartý josparlanyp otyr.
Olar:
1) sabaq jospary;
2) úlgerimdi onlaın jýrnalda toltyrý;
3) qosymsha bilim berý pedagogteri úshin sabaqtan tys josparyn esepke alý jýrnaly;
4) synyp jetekshelerine arnalǵan «Adal azamat» baǵdarlamasyn iske asyrý jospary;
5) suranys boıynsha oqýshylarǵa beriletin minezdeme.
Tıisti normatıvtik-quqyqtyq aktilerge ózgerister engiziletin bolady.
Keshe Prezıdent Qasym-Jomart Toqaev óz Joldaýynda ustazdyń bilim berýine kedergi keltiretin basy artyq jumystardy doǵarý keregin aıtqan edi.
Quryltaı depýtaty Ashat Aımaǵambetov ustazdardy qorǵaý men qoldaý Prezıdenttiń aıryqsha nazarynda ekenin jetkizdi.
