Muǵalimderge arnalǵan jańa baǵdarlamalar ázirlenip jatyr
ASTANA. KAZINFORM – Pedagogterdi attestattaýdan ótkizý qaǵıdalary men sharttary qaıta qaralyp jatyr. Bul jaıynda oqý-aǵartý mınıstrliginen málim etti.
«Prezıdenttiń 2023 jyldyń 5 qazandaǵy Respýblıkalyq pedagogter sezinde bergen tapsyrmalaryn oryndaý maqsatynda qazirgi ýaqytta Pedagogterdi attestattaýdan ótkizý qaǵıdalary men sharttary qaıta qaralyp jatyr. Attestattaý qaǵıdalarynyń jobasynda oqytý men oqytý praktıkasyna negizdelgen pedagogterdi baǵalaý kózdeledi. Budan basqa, pedagogterdiń, basshylardyń, ádiskerlerdiń, attestattaý komıssııasy músheleriniń sabaqtardy baqylaýy qarastyrylady. Qaǵıdalar jobasynda oqytý sapasyn arttyrý arqyly nátıje beretin pedagogtiń tıimdi tájirıbesine nazar aýdarylady. Búginde bilim berý uıymdarynyń pedagogteri keminde úsh jylda bir ret biliktilikti arttyrý kýrstarynan ótedi. Qazirgi ýaqytta kýrstyq daıarlyq tásilderin jańartý boıynsha pedagogterdiń biliktilik sanattaryna sáıkes deńgeılik bilim berý baǵdarlamalary ázirlenýde», - dep atap ótedi mınıstrlikten agenttiktiń resmı saýalyna oraı.
Vedomstvonyń naqtylaýynsha, pedagogterdiń kelesi deńgeılerine sáıkes oqytýdyń jańa ádistemelerin meńgerýi mynadaı taqyryptardy qamtıdy:
* bastaýysh (qarapaıym) – oqytýdyń neǵurlym tıimdi ádisterin, bilim alýshylardyń oqý jetistikterin baǵalaý tetikterin ıgerý boıynsha pedagogterdiń kásibı quzyrettilikterin qalyptastyrýǵa (pedagog-taǵylymdamashylar men pedagogterge baǵdarlanǵan);
* jalǵastyrýshy (orta) – bilim alýshylardyń bilim jetistikteri monıtorınginiń nátıjeleri (BBJM) boıynsha kórsetkishteri tómen bolǵan bilim alýshylarmen jumys isteýge (pedagog-moderatorǵa, pedagog-sarapshyǵa baǵdarlanǵan);
* jetildirilgen (kúrdeli) – naqty pándi tereńdetip oqytý jáne daryndy bilim alýshylarmen jumys ádisterin ıgerý boıynsha pedagogterdiń kásibı quzyrettilikterin qalyptastyrýǵa baǵyttalǵan (pedagog-sarapshyǵa, pedagog-zertteýshige jáne pedagog-sheberge baǵdarlanǵan).
«Pedagogterdiń biliktiligin arttyrý kýrstary baǵdarlamalarynyń mazmuny «Pedagog» kásibı standartyna sáıkes pedagogıkalyq qyzmettiń barlyq túrlerin iske asyrý úshin pedagogke qajetti pándik, psıhologııalyq-pedagogıkalyq, áleýmettik, tsıfrlyq jáne basqa da quzyretterdiń ońtaıly araqatynasyn qamtıtyn bolady. Budan basqa, jergilikti atqarýshy organdar pedagog kadrlarǵa qajettilikti eskere otyryp, pedagogterdi daıarlaý, jumysqa ornalastyrý, biliktiligin arttyrý, ádistemelik jáne áleýmettik qoldaý jónindegi óńirlik baǵdarlamalardy ázirleýde»,- dedi mınıstrlikten.
