Muǵalimderdiń kúndelikti jumysyn JI arqyly avtomattandyrýǵa bolady — Prezıdent

ASTANA. KAZINFORM — Prezıdent Qasym-Jomart Toqaev muǵalimder kóp ýaqytyn jumsaıtyn kúndelikti kúıbeń sharýany jasandy ıntellekt arqyly avtomattandyrýdyń mańyzyna nazar aýdardy. 

— Algorıtmder shákirtterge jeke tapsyrmalar men daıyndyq testterin ázirlep, jaýaptardy tekserip, olarmen jyldam keri baılanys ornata alady. Mundaı tehnologııalyq sheshim muǵalimderdiń jumysyn edáýir jeńildetip, ustazdyq qyzmetimen aınalysýyna múmkindik beredi. Biraq bir nárse árdaıym este bolýǵa tıis: muǵalimniń janashyrlyǵyn jáne aqyl-parasatyn eshbir tehnologııa almastyra almaıdy, — dedi Memleket basshysy jasandy ıntellektini damytý jónindegi keńestiń alǵashqy otyrysynda.

Sondyqtan muǵalim men oqýshy arasyndaǵy adamı qarym-qatynas bilim berý úderisiniń ózegi bolyp qalýǵa tıis.

— Bizdiń maqsatymyz — pedagogterdi basy artyq jumystan bosatý, óz mıssııasyn alańsyz atqarýyna jaǵdaı jasaý. Úkimet jasandy ıntellektini bilim berý júıesine engizgen kezde osy qaǵıdany eskerýi kerek, — dedi Qasym-Jomart Toqaev.

Aıta keteıik, elordada Memleket basshysynyń tóraǵalyǵymen Jasandy ıntellektini damytý jónindegi keńestiń alǵashqy otyrysy ótti.

Buǵan deıin Prezıdent Qasym-Jomart Toqaev elimizde jasandy ıntellekt salasyna mamandanǵan jańa zertteý ýnıversıtetin qurýdy tapsyrǵan edi.

Sonymen birge, Prezıdent oqýshylardyń tsıfrlyq profılderin jasaýdy tapsyrdy.