Muǵalimderdi mazalaýǵa shekteý: ata-analar chatyna reglament qoıyla ma
ASTANA. KAZINFORM — Úkimet otyrysynan keıingi brıfıngte Oqý-aǵartý mınıstri Juldyz Súleımenova jumystan tys ýaqytta ustazdardy orynsyz mazalamaý jóninde málimdeme jasady.
Jýrnalıster odan ata-analar chatyna arnaıy reglament bekitý jaıynda surady.
Mınıstr aldymen mektep oqytýshylarynyń aýyr júktemesi men ıgi jumysyna kóńil aýdarǵysy keletinin aıtty. Muǵalim kúnine kem degende 6 saǵat aýdıtorııamen jumys isteıtindikten, bul másele óte ózekti.
— Bastaýysh synyptary men emtıhan synyptaryndaǵy muǵalimderdiń júktemesi odan da aýyr. Árıne, sabaq bitkennen keıin de ata-analardyń jedel ári mańyzdy suraqtary bolýy múmkin. Ondaı jaǵdaıda bizdiń ustazdarymyz mindetti túrde balalardyń ata-analaryna habarlasyp, máseleniń sheshilýine atsalysady. Biraq kez kelgen usaq-túıekke bola, jumystan tys ýaqytta muǵalimderdi mazalamaıtyn qoǵamdyq etıkanyń jańa normasyn usynamyn. Sebebi, ustazdarymyzdyń jumystan tys ýaqytynda jeke ómiri bar, — dedi Juldyz Súleımenova.
Onyń sózinshe, muǵalimder tynyǵyp, zeıinin qalpyna keltirip, emotsınaldy túrde kelesi kúnge daıyn kelýi kerek. Sondyqtan mınıstr ata-analar qoǵamdastyǵyna mundaı úndeý jasap otyr.
Sonymen qatar, ol bıyl 4,1 mln bala mektepke barǵanyn eske saldy. Demek, 8 mıllıondaı ata-ana bar. Al ustazdar sany — 420 myń.
— Ustazdardyń júktemesi týraly ata-analar da oılaryn aıtady. Qandaı máselemen jedel habarlasý kerek, qandaı máseleni erteńge qaldyrýǵa bolady — bul normany, etıkanyń jańa standartyn birlesip sheshemiz dep oılaımyn, — dep túıindedi Juldyz Súleımenova.
Aıta keteıik, buǵan deıin Úkimet otyrysynda Oljas Bektenov mınıstrlerge qandaı tapsyrmalar bergenin jazǵanbyz.
