Muǵalimderdi qaǵazbastylyqtan bosatý jáne bala tárbıesi: Prezıdent Joldaýy týraly pikir
ASTANA. KAZINFORM — Astana qalasyndaǵy №101 mektep dırektorynyń orynbasary Qýanar Meıman Prezıdent Joldaýyndaǵy bilim berý salasyna qatysty bastamalarǵa pikir bildirdi. Onyń aıtýynsha, muǵalimderdi artyq qujattamadan bosatý, mektepterdiń materıaldyq bazasyn nyǵaıtý jáne balalardy jaýapkershilikke tárbıeleý mańyzdy.
— Bilim berý salasyndaǵy qaǵazbastylyqty azaıtyp, muǵalimderdi artyq jumystan bosatý — ózekti máselelerdiń biri. Óıtkeni ustazdyń basty mindeti — qujat toltyrý emes, balaǵa sapaly bilim berip, sanaly ári jaýapkershiligi joǵary urpaq tárbıeleý. Sonymen qatar oqýshy men muǵalim arasyndaǵy ózara túsinistik pen syılastyqty nyǵaıtý mańyzdy. Bul qaǵıdalar «Adal azamat» birtutas tárbıe baǵdarlamasynyń qundylyqtarymen de úndesedi, — dedi ol.
Qýanar Meımannyń aıtýynsha, bilim berý salasyn damytý úshin muǵalimderdiń jaǵdaıyn jaqsartýmen qatar, mektepterdiń materıaldyq-tehnıkalyq bazasyn nyǵaıtý jáne zamanaýı bilim berý ortasyn qalyptastyrý qajet. Sońǵy jeti jylda bilim salasyna bólinetin qarjy úsh ese artyp, 6,4 trıllıon teńgege jetti. Sońǵy bes jylda 1 mıllıonnan astam oqýshyǵa arnalǵan 1120 mektep salyndy. Sonymen qatar 5 myńnan astam aýyl mektebiniń materıaldyq-tehnıkalyq bazasy jańartylyp, bilim berý uıymdarynda 7 myńnan astam zamanaýı pán kabıneti jabdyqtalǵan.
— Prezıdenttiń kelesi jyldy Jalpyhalyqtyq aýqymdy qurylys jyly dep jarııalaýy bilim berý ınfraqurylymyn damytýǵa da serpin beredi. Bul óskeleń urpaqtyń sapaly bilim alyp, jan-jaqty damýyna jaǵdaı jasaý baǵytyndaǵy jumystardyń jalǵasatynyn kórsetedi. Jańa Konstıtýtsııada Qazaqstannyń zaıyrly memleket ekeni aıqyndalǵan. Sondyqtan bilim berý júıesin jetildirip, balalardyń zamanaýı talaptarǵa saı bilim alýyna múmkindik jasaý mańyzdy. Óskeleń urpaqty izgilikke, jaýapkershilikke jáne jasampazdyqqa tárbıeleý — memleket, ustazdar men ata-analarǵa ortaq mindet. Osy baǵytta kúsh biriktirsek, balalardyń úılesimdi damýyna jol ashamyz, — dep sanaıdy bilim salasynyń mamany.
Buǵan deıin bıýdjetten jalaqy alatyn 370 myńnan astam qyzmetkerdiń tabysyn arttyrýǵa jaǵdaı jasalatynyn jazǵan edik.
Al elde pedagog mártebesi qalaı qorǵalyp jatqanyn myna sholý maqaladan oqyńyz.
