Muǵalimder oqýshynyń ómiri men densaýlyǵyna tek oqý protsesi kezinde jaýapty bolmaq

ASTANA. KAZINFORM — Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine pedagog mártebesi jáne bilim berý máseleleri boıynsha ózgerister men tolyqtyrýlar engizý týraly» zań jobasy engizildi. 

— Atalǵan zań jobasy pedagogterdiń quqyǵyn qorǵaýdy kúsheıtý maqsatynda Májilis depýtattarynyń bastamasymen ázirlendi. Qujatta kelesi normalar usynyldy. Birinshiden, pedagogterdiń balalardyń ómiri men densaýlyǵy úshin jaýapkershiligin tek oqý protsesi barysynda aıqyndaý eskerilgen, ıaǵnı oqýdan tys ýaqytta jáne kanıkýl nemese keshki ýaqytta ata-anasynyń jaýapkershiligi bolýy tıis. Bul másele boıynsha Memleket basshysynyń Tamyz keńesinde bergen tapsyrmasy bar. Ekinshiden, pedagogterdi olardyń kásibı qyzmetine qatysy joq túrli is-sharalarǵa tartýǵa jol bermeý normasy qamtylǵan, — dedi depýtat Ashat Aımaǵambetov Májilistiń jalpy otyrysynda.

Sonymen qatar ol eseptilikti bir mezgilde eki formatta — qaǵaz jáne elektrondy túrde júrgizýge tyıym salý usynysy engizilgenin aıtty. Tek bir formatta ǵana bolýy tıis.

— Munymen qosa, «Ákimshilik quqyq buzýshylyq týraly» Kodeksine pedagogterdiń quqyǵyn buzǵany úshin sanktsııalardy kúsheıtý jónindegi naqty normalardy usynyp otyrmyz. Osy oraıda Májilistiń Áleýmettik-mádenı damý komıteti zań jobasyn qarap, ol boıynsha qorytyndy ázirleýge daıyn, — dedi depýtat.

Aıta keteıik, buǵan deıin qaı óńirlerde áli de muǵalim tapshylyǵy bar ekenin jazǵan edik.