Muǵalimder men mektep dırektorlaryn jumysqa alýdyń jańa tártibi kúshine enedi
ASTANA. KAZINFORM – «Memlekettik bilim berý uıymdarynyń birinshi basshylary men pedagogtary laýazymdaryna taǵaıyndaý, laýazymdarynan bosatý qaǵıdalaryn bekitý týraly» Bilim mınıstri men Eńbek jáne halyqty áleýmettik qorǵaý mınıstriniń birlesken buıryǵynyń jańa redaktsııasy 15 sáýirde kúshine enedi.
Jańa tártip boıynsha bilim berý uıymynyń basshysy laýazymyna konkýrs ótkizý mynandaı kezeńderden turady:
— bos laýazym paıda bolǵan kúnnen bastap 20 jumys kúninen keshiktirmeı konkýrs ótkizý týraly habarlandyrýdy jarııalaý;
— konkýrsqa qatysýǵa úmitkerlerden qujat qabyldaý;
— úmitkerlerdiń qujattarynyń Úlgilik biliktilik sıpattamalarynyń biliktilik talaptaryna sáıkestigin tekserý;
— memlekettik organnyń konkýrstyq komıssııasy ótkizetin konkýrsqa qatysýshylarmen áńgimelesý.
Al orta bilim berý uıymdarynyń laýazymdaryna pedagogtardy taǵaıyndaý konkýrsy «Pedagogty jumysqa qabyldaý» modýli (https://hr-nobd.edu.kz/) arqyly elektrondy formatta ótkiziledi. Bul modýl iske qosylǵansha konkýrs qujattary qaǵaz kúıinde qabyldanady. Al iske qosylǵannan keıin de portalda aqaý bola qalsa, qaǵaz kúıinde qujat qabyldaýǵa ruqsat berilmek.
Konkýrs nátıjeleri týraly sheshimdi úmitkerdiń jınaǵan upaılary boıynsha konkýrs komıssııasy qabyldaıdy. Eń kóp upaı jınaǵan úmitker konkýrs jeńimpazy bolyp esepteledi jáne oǵan sheshim qabyldaýǵa 24 saǵat ýaqyt beriledi.
Bul komıssııanyń quramyna bilim berý uıymy ákimshiliginiń ókilderi (birinshiden basqa meńgerýshisi), tıisti ádistemelik kabınetterdiń (ortalyqtardyń) ádiskerleri, bilim berý salasyndaǵy azamattyq qoǵam ókilderi, aýdandyq (qalalyq) bilim bóliminiń mamandary, muǵalimder kire alady.
Sondaı-aq, konkýrsqa qujat usynǵan úmitkerdiń sybaılas jemqorlyqpen baılanysy bar ekeni anyqtalsa, konkýrs protsedýrasynan kez kelgen ýaqytta shettetiletini aıtylǵan.
Qujatta pedagogti de, bilim berý uıymynyń basshysyn da jumystan bosatý tártibi Eńbek Kodeksi 49-babynyń 1), 2), 3), 5), 6), 7), 8), 9 tarmaqshalarynda kórsetilgen tártip boıynsha júzege asatyny da aıtylǵan.
Buǵan deıin BQO-daǵy mektep ǵımaratynan shashtaraz qalaı ashylǵanyn jazǵan edik.