Muǵalimder quqyǵy jıi buzylatyn 5 oblys belgili boldy

ASTANA. KAZINFORM – Elimizdiń 5 oblysynda áli de pedagog mártebesine qaıshy áreketterge jol berilip keledi. Bul týraly Bilim salasynda sapany qamtamasyz etý komıtetiniń tóraǵasy Serik Áshirov aıtty. 

– Zań buzýshylyqtar sany 2020 jylmen salystyrǵanda úsh esege azaıǵanymen, bul másele áli de ózektiligin joǵaltqan joq. Qostanaı, Almaty, Abaı, Jambyl jáne Pavlodar oblystarynda áli de buzýshylyqtar bolyp jatyr. Olar kóp jaǵdaıda pedagogke tán emes jumystarǵa tartý boıynsha, pedagogterdiń ar-namysyna tııý, ıaǵnı balaǵattaý boıynsha, kontsert bıletterin satyp alýǵa jáne ártúrli sharalarǵa kórermen retinde qatysýǵa májbúrleý boıynsha tirkelgen, – dedi ol QR Oqý-aǵartý mınıstrliginde ótken keńeste.

Sondaı-aq spıker elimizde muǵalimder arasynda jasyryn saýalnama júrgizilgenin jáne onyń nátıjesin aıtty.

— Komıtet osy jyldyń shilde-tamyz aılarynda pedagogter arasynda «Pedagog mártebesi týraly» zań normalarynyń saqtalýy týraly qysqasha anonımdi saýalnama júrgizdi. Respondentter «Pedagog mártebesi týraly» zań normalarynyń buzylý faktileri bar dep jaýap bergen. Olardyń eń kóp úlesi Pavlodar, Túrkistan jáne Almaty oblystarynda, - dedi Komıtet basshysy.

QR Oqý-aǵartý mınıstri Ǵanı Beısembaevtyń basshylyǵymen ótken jınalysqa oblys ákimderiniń orynbasarlary, qala jáne aýdan ákimderi, sondaı-aq bilim basqarmalary men bólimderiniń basshylary onlaın qatysty. Onda jergilikti atqarýshy organdardyń basshylaryna QR «Pedagog mártebesi týraly» Zańnyń negizgi normalary túsindirildi.

Aıta keteıik, buǵan deıin mınıstr Ǵanı Beısembaev Ákimdikterge pedagog mártebesine qatysty talaptardy taǵy da túsindirý kerektigin aıtqan bolatyn.