Muǵalimdi óltirgen oraldyq 12 jylǵa sottaldy
ORAL. KAZINFORM – BQO qylmystyq ister jónindegi mamandandyrylǵan aýdanaralyq sotynda Oral qalasynda muǵalimdi óltirgen Temir Sársenovke qatysty iske núkte qoıyldy.
BQO sotynyń baspasóz qyzmetinen málim etkenindeı, atalǵan turǵynǵa QR QK 99-babynyń 1-bóligi (adam óltirý), 188-babynyń 1-bóligi (urlyq) jáne 287-babynyń 3-bóligine (atys qarýyn, oq-dárilerdi zańsyz ıemdený jáne saqtaý) sáıkes aıyp taǵyldy.
Sotta anyqtalǵanyndaı, bıylǵy sáýirde sottalýshy burynnan tanys muǵalimniń úıine kelip, ekeýara kelisim boıynsha kompıýterin jóndegen. Sodan keıin ekeýiniń arasynda kıkiljiń týyndap, er adam áıeldi jatyn bólmedegi dıvanǵa jyǵyp, ústindegi koftasynyń jaǵasymen qylǵyndyrǵan. Marqum sol jerde jan tapsyrǵan.
Sottalýshy onymen qoımaı, qylmystyq oıyn aqyryna deıin jetkizgenine kúmándanyp, jábirlenýshiniń moınyna pyshaq jaraqattaryn keltirgen. Saldarynan áıeldiń moıyn qan tamyrlary túgel kesilgen.
Sodan keıin jábirlenýshige tıesili altyn buıymdardy, sómkesin, uıaly telefonyn jáne aqshany ıemdenip, oǵan 1 mln 740 myń teńge mólsherinde materıaldyq zalal keltirgen.
Oǵan qosa atalǵan er adam 2023 jyldyń qyrkúıek aıynyń sońynda Báıterek aýdany Volodar aýyly mańynda Jaıyq ózeni jaǵasyndaǵy orman alqabynda «TOZ 17-01» markaly karabındi, qasyndaǵy oq-dárilerimen kórip, bulardy zańsyz ıemdenip, turǵylyqty meken-jaıynda saqtaǵan.
«Sot sottalýshynyń jasaǵan qylmystarynyń sıpaty men qoǵamǵa qaýiptilik dárejesin eskere otyryp, oǵan QR QK 99-babynyń 1-bóligimen 11 jylǵa, 188-babynyń 1-bóligimen 1 jylǵa, 287-babynyń 3-bóligimen 1 jylǵa, túpkilikti 12 jyl merzimge bas bostandyǵynan aıyrý jazasyn taǵaıyndady. Jábirlenýshiniń talap aryzy ishinara qanaǵattandyrylyp, sottalýshydan oǵan keltirilgen 1,8 mln teńge materıaldyq jáne 10 mln teńge moraldyq zalal óńdirildi. BQO soty qylmystyq ister jónindegi apellıatsııalyq sot alqasynyń 13 qarashadaǵy sheshimimen úkim ózgerissiz qaldyryldy. Úkim zańdy kúshine endi», dep habarlady vedomstvodan.
Qosa keteıik, sottalýshynyń qolynan bastaýysh synyptar muǵalimi Nadejda Nıkıtına qaza tapqan bolatyn.
Eske sala keteıik, budan buryn BQO-da ákesin óltirgen turǵynnyń 10 jylǵa sottalǵanyn jazǵan bolatynbyz.
