Muǵalimdi moralǵa jat qylyǵy úshin jumystan bosatýǵa bola ma
ASTANA. KAZINFORM — Konstıtýtsııalyq Sot «moralǵa jat qylyq» uǵymynyń quqyqtyq aıqyndylyǵy máselesin qarady.
Konstıtýtsııalyq Sot tárbıe berý fýnktsııalaryn atqaratyn jumyskerdiń osy jumysty jalǵastyrýmen syıyspaıtyn moralǵa jat qylyq jasaǵany úshin eńbek shartyn buzýdy kózdeıtin Eńbek kodeksiniń 52-baby 1-tarmaǵynyń 14) tarmaqshasyn Konstıtýtsııaǵa sáıkestigi turǵysynan tekserý týraly ótinishti qarady.
Ótinish berýshi mekteptiń pedagogıkalyq ádep jónindegi keńesiniń sheshimi negizinde jumystan bosatylǵan. Bul sheshimmen kelispegen ol kelisý komıssııasyna jáne sottarǵa júgingen. Іs boıynsha qabyldanǵan sot aktileri ózgerissiz qaldyrylǵan.
Ótinish berýshiniń pikirinshe, moralǵa jat qylyqtyń naqty quqyqtyq belgileri men obektıvti ólshemsharttarynyń bolmaýy atalǵan normany qoldaný kezinde keńinen paıymdaýǵa jol beredi jáne onyń eńbek etý men sot arqyly qorǵalý quqyqtaryn buzady.
Konstıtýtsııalyq Sot zańnamada adamgershilik qaǵıdattaryna qatysty normatıvtik baǵdarlar, onyń ishinde pedagogıkalyq ádepke qoıylatyn arnaıy talaptar men olardy buzǵany úshin jaýaptylyq kózdelgenin atap ótti.
— «Moralǵa jat qylyq» uǵymy óziniń tabıǵaty boıynsha baǵalaý sıpatyndaǵy uǵym sanalaady. Sondyqtan onyń mazmunyn is-áreketterdiń túpkilikti tizbesi arqyly tolyq ashyp kórsetý múmkin emes. Mundaı qylyqty baǵalaý naqty istiń mán-jaılaryn, sondaı-aq áleýmettik, mádenı jáne kásibı erekshelikterdi eskerýdi talap etedi. Konstıtýtsııalyq Sot atalǵan uǵymnyń naqty mán-jaılardy eskere otyryp qoldanýǵa múmkindik beretin jetkilikti normatıvtik aıqyndyqqa ıe degen qorytyndyǵa keldi. Sonymen qatar Sot ótinish berýshiniń kelisý komıssııasyna jáne sottarǵa júginý arqyly óz quqyqtaryn qorǵaýdyń zańda kózdelgen tetikterin paıdalanǵanyn atap ótti, — delingen habarlamada.
Osydan buryn Konstıtýtsııalyq Sot jer daýlaryna qatysty Joǵarǵy Sot qaýlysyn tekseretinin jazdyq.