Muǵalim pánin jetik meńgerip qana qoımaı, jańa tehnologııalardy da qoldana bilýi kerek

ASTANA. KAZINFORM - Muǵalim pánin jetik meńgerip qana qoımaı, jańa tehnologııalardy da qoldana bilýi kerek. Bul týraly elordada ótip jatqan ustazdardyń respýblıkalyq tamyz konferentsııasynda Memleket basshysy Qasym-Jomart Toqaev aıtty. 

- Alda áli de aýqymdy jumys bar. Bosańsýǵa bolmaıdy. Úkimet pen ákimder bul jumysqa basa mán berýi kerek. Mysaly, bilim berý mekemelerin tıisti ınteraktıvti qural-jabdyqpen qamtamasyz etý kerek. Oqytýǵa arnalǵan tsıfrlyq platformalar men elektrondy oqýlyqtar barlyq oqýshyǵa qoljetimdi bolýǵa tıis. Bul rette oqytý materıaldary túgel muqııat saraptalýy kerek. Kelesi mańyzdy mindet. Balalarǵa jastaıynan jasandy ıntellekt tehnologııasyn oqytqan jón. Bul – bolashaqta jastarymyzdyń básekege qabiletti ozyq maman bolýyna qajetti birden-bir daǵdy, - dedi Memleket basshysy.

Prezıdenttiń atap ótýinshe, bul pedagogterge de qatysty. Muǵalim óz pánin jetik meńgerip qana qoımaı, pedagogıkalyq tájirıbede jańa tehnologııalardy da qoldana bilýi kerek.

- Jalpy, bilim berý salasyn múldem jańa sapaly deńgeıge shyǵarý úshin tsıfrlandyrý men jasandy ıntellektiniń múmkindikterin tolyq paıdalanǵan jón. Sizder tutas elimizdi tehnologııalyq turǵydan jańǵyrtý isinde aldyńǵy shepten tabylyp, bizdiń qoǵamdy naǵyz progressıvti ári damyǵan ultqa aınaldyrýǵa eren úles qosasyzdar dep senemin, - dedi Qasym-Jomart Toqaev.

Memleket basshysynyń paıymynsha, muǵalimder memlekettik mańyzy bar jumysty atqaryp jatyr.  

Degenmen ustazdyń nazary bala oqytý isinde bolýǵa tıis.