Muǵalim bolyp jumysqa turýǵa 1,5 mln teńge para suraıdy — Dáýlet Muqaev

ASTANA. KAZINFORM — Májilis depýtaty Dáýlet Muqaev áleýmettik-mádenı damý komıtetiniń otyrysynda Qyzylorda oblysy men Shymkentten keletin shaǵymdardyń mazmunyna toqtaldy. 

«Jemqorlyq barlyq salada kezdesedi. Bala dúnıe kelgennen bastap qaıtys bolǵanǵa deıin. Sózdiń ashyǵy kerek. Qudaı saqtasyn, adam ólse, Almatydaǵy taýdyń mańaıy, Keńsaı zıratynyń mańaıy… Odan keıin bala dúnıege keletin kezde jaqsy dáriger, perzenthana kerek dep taǵy izdeıdi. Odan keıin balabaqsha, mektep ketedi. Bala ýnıversıtetke túsedi. Osydan soń úılenip, otbasyly bolady. Osy kezde olarǵa úı kerek. Ony alý úshin úıdiń kezegine turý qajet. Jumysqa ornalasady. Osy salanyń bárinde — jemqorlyq. Ásirese, maǵan Qyzylorda oblysy, Shymkent qalasynan (turǵyndar) kóp hat jazady. Mysaly, jaı ǵana eden jýýshy bolyp jumysqa ornalasý úshin 500 myń teńge suraıdy eken. Muǵalimderdiń stavkasy 1-1,5 mln teńge bolyp ketken», — dedi depýtat.

Sybaılas jemqorlyqqa qarsy is-qımyl agenttigi preventsııa qyzmetiniń basshysy Saıan Ahmetjanov halyqtan jemqorlyq faktisi boıynsha keletin shaǵymdar qalaı qaralatynyn aıtty.

«Siz 1424 dep aıtyp jatyrsyz. 1424 nómirine táýlik boıy habarlasýǵa bolady. Onda qylmys jaıly málimet bolsa, materıal tirkeledi… Biz osy másele boıynsha ár salada kún saıyn qabyldaý júrgizemiz. Jumys istep jatyrmyz. Anonımdi fakti bolsa, ondaı jaǵdaıda (derekti) taldaýǵa alamyz. Muny kim aıtty, derek qaıda tirkeldi, qaı memlekettik organ, ol mektep pe, balabaqsha ma? Ony anyqtaýǵa bolady. Alaıda qylmystyq is qozǵaý úshin aryzdanýshy bolýy kerek», — dedi antıkor ókili.