Muǵalimdi mindetinen tys jumysqa tartqan basshylar aıyppul arqalaıdy - zań jobasy
ASTANA. QazAqparat - Qazaqstanda aldaǵy ýaqytta muǵalimderdi mindetinen tys jumysqa tartqan laýazymdy adamdar jazalanýy múmkin. Bul týraly Qazaqstan Respýblıkasy Bilim jáne ǵylym qyzmetkerleri kásipodaǵy tóraǵasynyń orynbasary Aıgúl Muqasheva Astanada «Pedagogtar mártebesi týraly» zań jobasyn talqylaý jıynynda tilshilerge aıtyp berdi, dep habarlaıdy QazAqparat tilshisi.
«Pedagogtar mártebesi týraly» usynylyp otyrǵan zań jobasynda muǵalimge til tıgizip, onyń kásibı jumysyna aralasqysy kelgen laýazymdy adamdardyń jaýapkershiligi kózdelgen. Osy zań arqyly ondaı sanattaǵy adamdarǵa aldymen eskertý berip, keıin ákimshilik jaýapkershilikpen aıyppul salý kózdelgen. Máselen, muǵalimdi mindetinen tys jumysqa tartatyn bolsa, ol laýazymdy adam aldymen eskertý alyp, keıin 10 AEK kóleminde, ıaǵnı 25 250 teńge mólsherinde aıyppul arqalaıtyn bolady», - deıdi Aıgúl Muqasheva.
Ol sonymen birge, muǵalimderdiń qyzmetinen tys jumystarǵa ne jatatynyn túsindirip berdi.
«Ol jumystardyń sanatyna - senbilik jatady. Ózińiz biletindeı, bizdiń jumys berýshiler ár senbi saıyn senbilik uıymdastyrýdy jaqsy kóredi. Ol jumystardyń sanatyna úı aralaýdy da jatqyzýǵa bolady», - deıdi ol.
Aıgúl Muqasheva qalany ýchaskege bólip tastap, muǵalimderdi aralatý jumysy baryn jasyrmady.
«Muǵalimniń negizgi mindeti - balany tárbıeleý jáne oqytý. Basqa eshqandaı jumyspen muǵalim basyn aýyrtpaýy kerek. Mindetinen tys jumysqa muǵalimdi mektep dırektorymen birge jergilikti atqarýshy organdardyń da qyzmetkerleri tartqysy keledi. Buıryq qaıdan kelip jatyr? Mektep dırektorynyń tek buıryqty oryndaıtyny belgili. Sol sebepti, bul máselege keń aýqymda qaraý kerek», - deıdi Aıgúl Muqasheva.
