Muǵalimdi kásibine qatysy joq jumysqa tartqandarǵa aıyppul salynady-mınıstr
NUR-SULTAN. QazAqparat - «Pedagogtar mártebesi týraly» zań jobasy aıasynda qajetti normalar Ákimshilik quqyq buzýshylyq týraly kodekske de engiziledi, dep xabarlaıdy QazAqparat tilshisi.
QR Bilim jáne ǵylym mınıstri Kúlásh Shámshıdınovanyń aıtýynsha, mańyzdy máselelerdiń biri - ol muǵalimderdiń quqyqtaryn qorǵaý. Atalǵan jumys úsh baǵytta júrgiziledi.
«Birinshiden, muǵalimniń kásibı qyzmetine aralasýǵa jol bermeý. Ekinshiden, pedagogtyń ar-namysyn qorǵaý. Úshinshiden, ustazdardyń kásibı qyzmetine qatysy joq sharalarǵa tartýdy toqtatý.
«Bunyń bári zańda ǵana kórsetilmeıdi. Ákimshilik quqyq buzýshylyq týraly kodekske de engiziledi. Sonda naqty normalar bolady. Aldymen eskertý jasalady, odan keıin aıyppuldar salynady», - dedi K.Shámshıdınova Úkimet úıinde ótken baspasóz máslıxatynda.
Budan bólek, «pedagog» biryńǵaı anyqtamany engizý qarastyrylǵan. Soǵan qaraı barlyq bilim salasynyń qyzmetkerlerin keltirý kerek.
Aıta keteıik, «Pedagogtar mártebesi týraly» zań jobasyn tamyz aıynda Parlament Májilisiniń qaraýyna engizý josparlanyp otyr. Sonyń ishinde muǵalimderdiń zeınetke shyǵý máselesi de bar.
«Qazir biz zeınetkerlik máselesin basqa rakýrsta kóterip jatyrmyz. Máselen, adam pedagogıkalyq joǵary oqý ornyn bitirip, birden mektepke jumysqa kelse, sol jerde biraz ýaqyt jumys istese, zeınetke shyqqanda onyń pedagogıkalyq joǵary oqy ornynda bilim alǵan merzimin de eńbek ótili retinde esepteý kerek. Biz osyndaı máseleni kóterip otyrmyz. Sony tıisti memlekettik organdarmen pysyqtap jatyrmyz», - deıdi K.Shámshıdınova.
