Muǵalimdi artyq jumystan qorǵaýymyz qajet - ónegeli ustaz Mark Podolskıı
QYZYLORDA. QazAqparat- Mark Zaharovıch Podolskıı talaı býyndy tárbıelep, talaı túlekti qanattandyrǵan ustaz.
Ol jarty ǵasyrdan astam ýaqytyn mektepke arnady. Jýyrda Mark Zaharovıch 85 jasqa toldy. Osyǵan oraı, Qorqyt ata atyndaǵy QMÝ Stýdentter saraıynda saltanatty shara ótti. Ony qalalyq bilim basqarmasynyń qoldaýymen mereıtoı ıesi 20 jyldan astam ýaqyt basshylyq jasaǵan № 198 mekteptiń ujymy uıymdastyrdy, dep habarlady QazAqparat HAA tilshisi.
M.Podolskıı eńbek jolyn pıoner jetekshisi bolýdan bastady. Makarenko atyndaǵy balalar úıiniń tárbıeshisi atanǵan kezi de bar. Mark Zaharovıchtiń esimi № 198 mektepti basqarǵan jyldary el arasynda keńinen tarady. Ol jetekshilik etken bilim oshaǵy jańashyl dırektordyń bastamasy arqasynda toqsanynshy jyldarǵy qıyndyq qyspaǵyn kóp sezine qoıǵan joq.
Birinshi, mektep sheberhanalaryn qural-jabdyqtarmen qamtamasyz etýge basa mán berildi. Mektep reformasynyń alǵashqy jyldary oqýshylar men muǵalimderdiń belsendi eńbegin uıymdastyrý úshin ártúrli olımpıadalar men konkýrstar ótkizildi. Jańalyqshyl ustazdyń sol tustaǵy eńbegi jaıly shákirtteri áserli estelikter aıtty.
Solardyń biri «Atameken» Ulttyq kásipkerler palatasy Aqparattyq - kommýnıkatsııalyq tehnologııalar, bilim berý jáne ınnovatsııa komıtetiniń tóraǵasy Murat Ábenov óz lebizin ustazyna alǵys bildirýden bastady.
«Mark Zaharovıchtiń myńdaǵan shákirti bar, - dedi ol. - Solardyń biri retinde men ustazyma alǵysymdy bildiremin. Qazir elimizde modernızatsııanyń jańa tolqyny bastaldy. Ony júzege asyrý úshin bilimdiler qajet. Óıtkeni, qandaı zamanaýı tehnıka bolmasyn, adamsyz jumys isteı almaıdy. Sondyqtan da sol tehnıkamen jumys isteıtin balalardy oqytyp jatqan ustaz bilimi men biligi saı maman bolýy kerek. Mark Zaharovıch óziniń jańashyl ıdeıalarymen ańyzǵa aınalǵan adam. Kezinde balalardy kásipkerlikke baýlyp, talaı jannyń osy saladan jol tabýyna negiz qalady».
Keshte mereıtoı ıesin túrli ulttyq ortalyqtar ókilderi men bilim salasynyń ardagerleri quttyqtady. Mektep oqýshylary men JOO, kolledj stýdentteri ózderi daıyndaǵan kontserttik nómirlerin usyndy.
Mark Zaharovıch óz qýanyshyn bólisýge kelgen áriptesteri men shákirtterine, tileýles jandarǵa alǵysyn jetkizdi.
«Jalǵyz adam eshqashan jetistikke jete almaıdy. Men árdaıym ujymnyń qoldaýyna súıendim. Sonymen qatar, meniń únemi qaıtalaıtyn bir qaǵıdam bar. Taǵy da aıtqym keledi: muǵalim - mekteptegi basty tulǵa. Olardy biz basy artyq jumystan qorǵaýymyz kerek. Qarap otyrsańyz, qazir muǵalimniń aınalyspaıtyn isi joq. Ol jol qaýipsizdigi týraly áńgime ótkizýi tıis, órt qaýipsizdigi týraly da aıtatyn sol. Oǵan qosa qanshama artyq mindetti arqalap júr. Keleshekti oılasaq, muny toqtatyp, muǵalimge óz mindetimen aınalysýǵa múmkindik berýimiz kerek», - dedi ol.
Óz sózinde Mark Zaharovıch bilim salasyndaǵy basqa da máseleler jaıly keńinen aıtyp, ózine qurmet tanytqan áriptesterine jyly lebizin bildirdi.
