Muǵalimderge oklad boıynsha aqy tóleý máselesi zerttelip jatyr – Ashat Aımaǵambetov

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov muǵalimderge saǵat sany boıynsha aqy tóleý júıesinen ketý máselesine qatysty pikir bildirdi, dep habarlaıdy QazAqparat tilshisi.

«Dúnıe júzindegi búkil bilim berý júıelerin qarasańyzdar, saǵatqa baǵyttap emes, oklad júıesi boıynsha jumys isteıdi. Saǵat sany boıynsha jumys isteıtin birneshe memleket qana qaldy. Sondyqtan bul – dúnıejúzilik tájirıbe. Biraq Qazaqstanda osy siz aıtqan júıege qatysty naqty sheshim qabyldanǵan joq. Kóship jatyrmyz dep biz áli aıta almaımyz. Jalpy, bul másele qazir zerttelip, zerdelenip jatyr. Sondyqtan sheshim tek qana osy zertteýlerdiń negizinde qabyldanady», - dedi mınıstr Úkimet otyrysynan keıin BAQ ókilderine.

Vedomstvo basshysy bul máseleniń talaıdan beri kóterilip kele jatqanyn eske saldy.

«Jasyrýǵa bolmaıdy, birneshe jyldan beri túrli sarapshylar, ártúrli halyqaralyq jáne ózimizdiń ǵalymdar usynys aıtyp jatyr. Degenmen, bul máseleni talqylaý kerek. Óıtkeni bilim júıesinde tez, shapshań oılanbaı sheshim qabyldaýǵa bolmaıdy. Talqylanyp, tıisti sheshim shyqqanda qosymsha habarlaımyz», - dedi mınıstr.

Vedomstvonyń deregi boıynsha, bıyl oqýshylardyń 9% mektep muǵalimi mamandyǵyn tańdaǵan.