Muǵalimderdiń jalaqysyn kóterý úshin 62 mlrd teńge bólinetin boldy
«Sizderdiń nazarlaryńyzǵa aǵymdaǵy jylǵa arnalǵan respýblıkalyq bıýdjetti naqtylaý týraly zań jobasy usynylyp otyr. Qujat Memleket basshysynyń Qazaqstan halqyna Joldaýlarynda jáne Prezıdenttiń 5 áleýmettik bastamalarynda berilgen tapsyrmalaryn iske asyrýǵa baǵyttalǵan. 2018 jylǵa arnalǵan respýblıkalyq bıýdjettiń bekitilgen kórsetkishterin naqtylaýǵa eldiń ózgertilgen makroekonomıkalyq kórsetkishter boljamy negiz boldy. Osylaısha respýblıkalyq bıýdjet túsimderi 81 mlrd teńgege ulǵaıtylyp, 8 trln 759, 7 mlrd teńgeni qurady», - dedi zań jobasyn tanystyrǵan QR Qarjy mınıstri Baqyt Sultanov.
Mınıstrdiń aıtýynsha, 2018 jylǵa arnalǵan respýblıkalyq bıýdjet shyǵystary 417 mlrd teńgegeden 425 mlrd teńgege ulǵaıyp, 9 trln 643 mlrd teńgeni quraıtyn bolady. Osy qarajat kóleminen 292,5 mlrd teńge Memleket basshysynyń «Qazaqstannyń Úshinshi jańǵyrýy: jahandyq básekege qabilettilik» jáne «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» joldaýlaryn iske asyrǵa baǵyttalatyn bolady.
«Birinshi blok adamı kapıtal sapasyn jaqsartýǵa 106 mlrd teńge baǵytalatyn bolady. Onyń ishinde muǵalimderdiń jalaqysyn 30-dan 50 paıyzǵa kóterýge 62 mlrd teńge, Nazarbaev Ýnıversıtetin odan ary damytýǵa 31 mlrd teńge, múgedekterdiń kútimin júzege asyratyn adamǵa jańa járdemaqy tóleýge 2,7 mlrd teńge baǵyttalady», - dedi Baqyt Sultanov.
Onyń dereginshe, ekonomıkanyń naqty sektorlary men aımaqtardy damytýǵa 115 mlrd teńge baǵyttaý usynylady. Onyń ishinde aýyldyq eldi mekenderdi aýyz sýmen qamtamasyz etýge qosymsha 31 mlrd teńge bólinedi. Munan bólek salynyp jatqan turǵyn úı nysandaryna kommýnıkatsııalyq ınfraqurylym tartýǵa 31,5 mlrd teńge, jergilikti joldardy jóndeýge 29 mılrd teńge jáne agroónerkásip keshenin kredıt jáne lızıng boıynsha paıyzdyq mólsherlemelerdi sýbsıdııalaý, agroǵylymdy damytýǵa 15,6 mlrd teńge baǵyttalady. Kıber qylmyspen kúres boıynsha is-sharalarǵa 71 mlrd teńge jumsalady.
«Prezıdenttiń 5 áleýmettik bastamasy negizindegi is-sharalardy iske asyrýǵa jáne 3, 4 bastamalarǵa 25 mlrd teńge baǵyttaý usynylady. Naqty aıtqanda, bilim berý tapsyrysyn 20 myń grantqa ulǵaıtýǵa 5 mlrd teńge, mıkrokredıtteýdi 60 mlrd teńgege jetkizý maqsatynda qosymsha 20 mlrd teńge baǵyttalatyn bolady. Munan basqa bıýdjet jobasynda Prezıdenttiń tapsyrmalary men buryn qabyldaǵan mindettemeler boıynsha jalpy somasy 99 mlrd teńgeni quraıtyn shyǵystar eskerildi», - dedi Baqyt Sultanov.
Mınıstrdiń sózine qaraǵanda, atalǵan shyǵystar aıasynda 25 mlrd teńge Astanany, 11 mlrd teńge Almaty qalalaryn odan ary damytý, áskerı qyzmetshilerdi turǵyn úımen qamtamasyz etý boıynsha is-sharlar men jobalar qarjylandyrylatyn bolady.
Osydan keıin Úkimet basshysy Baqytjan Saǵyntaev 2018 jylǵa arnalǵan respýblıkalyq bıýdjetti naqtylaý týraly zań jobasy maquldaýdy usynyp, ony Mınıstrler kabınetiniń músheleri qoldady.
«Premer-Mınıstrdiń keńsesi Qarjy mınıstrligimen birlesip, tıisti zań jobasyn 4 sáýirden kesheýildetpeı Parlament qaraýyna engizetin bolsyn», - dep tapsyrdy Baqytjan Saǵyntaev.
foto:vyatka-grad.ru
