Muǵalimderdiń zeınetke shyǵýyna qatysty qandaı ózgerister bolady
NUR-SULTAN. QazAqparat - QR Bilim jáne ǵylym mınıstri Kúlásh Shámshıdınova «Pedagogtar mártebesi týraly» zań jobasyn Parlamenttiń qaraýyna engizý merzimin atady, dep xabarlaıdy QazAqparat tilshisi.
«Bárińiz jaqsy bilesizder, bul zań jobasy qyzý talqylanǵan bolatyn. Pedagogtar da, depýtattar da talqyǵa saldy. Biraz eskertýler jasaldy. Sol sebepti zań jobasy qaıta qaraldy. Tamyz aıynda atalǵan qujatty Parlament Májilisine engizetin bolamyz», - dedi K.Shámshıdınova Úkimet úıinde ótken baspasóz máslıxatynda.
Osy oraıda mınıstr zań jobasynda kórsetilgen bir máselege toqtaldy. Ol - muǵalimderdiń zeınetke shyǵýy.
«Qazir biz zeınetkerlik máselesin basqa rakýrsta kóterip jatyrmyz. Máselen, adam pedagogıkalyq joǵary oqý ornyn bitirip, birden mektepke jumysqa kelse, sol jerde biraz ýaqyt jumys istese, zeınetke shyqqanda onyń pedagogıkalyq joǵary oqy ornynda bilim alǵan merzimin de eńbek ótili retinde esepteý kerek. Biz osyndaı máseleni kóterip otyrmyz. Sony tıisti memlekettik organdarmen pysyqtaýdamyz», - dep atap kórsetti K.Shámshıdınova.
Aıta keteıik, búgingi brıfıngte Bilim mınıstri bilim qyzmetkerleriniń jalaqysyn kóterý sharalary týraly aıtty. Atalǵan tapsyrmany QR Tuńǵysh Prezıdenti - Elbasy Nursultan Nazarbaev bergen bolatyn. Oǵan sáıkes, jalaqysy tómen bıýdjettik sala qyzmetkerleriniń jalaqysy 30 kóterilýi kerek. Búginde arnaıy tarıftik koeffıtsent bekitildi. Kúlásh Shámshıdınova jalaqynyń qalaı artatynyn naqty mysalmen kórsetti. Bilim mınıstri mektep dırektorlaryn taǵaıyndaýǵa qatysty usynysty da qoldady.
