Muǵalimderdiń biliktilik arttyrý kýrstary keıinge shegerildi
NUR-SULTAN. QazAqparat - Bilim jáne ǵylym mınıstri Ashat Aımaǵambetov koronavırýstyń taralýyna jol bermeý úshin elimizdegi muǵalimderdiń kýrstary keıinge shegerilgenin, keıbiri onlaın formatqa aýystyrylǵanyn málim etti, dep habarlaıdy QazAqparat tilshisi.
«Qosymsha bilim berý uıymdaryna keler bolsaq, balalar saraıy, mýzyka mektebi bizdiń elde kóp. Bul uıymdarǵa bir ǵana mekteptiń ǵana emes, qalanyń nemese eldi mekenniń barlyq balalary keledi. Sondyqtan osyndaı bilim berý uıymdarynda ınfektsııany juqtyrý qaýpi óte joǵary. Sondyqtan osyny eskere otyryp, bilim berý uıymdarynyń jumysyn 5 sáýirge deıin toqtattyq», - dedi Ashat Aımaǵambetov OKQ-da ótken baspasóz máslıhatynda.
Mınıstrdiń aıtýynsha olımpıada, spartakıadalar da keıinge shegerilgen.
«Baldáýren, Bóbek sekildi lagerlerge de balalardy alýdy toqtattyq. Biliktilik arttyrý kýrstary ótetinin bilesizder. Oǵan on myńdaǵan muǵalim qatysýy kerek edi. Biraq onyń kóbin onlaın formatqa kóshirdik. Al onlaın formatqa kóshpeıtin kýrstardy biz merzim boıynsha shegerý týraly sheshim qabyldadyq», - dedi ol.
Eske sala ketsek, Densaýlyq saqtaý mınıstri 14 naýryzda elordada ótken baspasóz máslıhatynda Eljan Birtanov Qazaqstanda eki adamnyń koronavırýs juqtyrǵanyn jetkizgen edi. Kóp ótpeı Mılan qalasynan Nur-Sultanǵa kelgen taǵy bir qazaqstandyqtan koronavırýs ınfektsııasy tabyldy.
Keıin Germanııadan ushyp kelgen Qazaqstannyń taǵy bir azamatynan koronavırýs anyqtaldy. Osylaısha bul dertke shaldyqqandar sany 4 adamǵa jetken edi.
