Muǵalimderdiń biliktiligin arttyratyn jańa júıe 2012 jyly tolyǵymen jumys isteýi tıis - B.Jumaǵulov
ASTANA. 31 qańtar. QazAqparat /Jasulan Joldybaev/ - Muǵalimder biliktiligin arttyrýdyń jańa júıesi 2012 jyly tolyǵymen jumys isteı bastaýy tıis.
Bul týraly búgin Bilim jáne ǵylym mınıstrliginiń keńeıtilgen alqa májilisinde vedomstvo basshysy Baqytjan Jumaǵulov málim etti.
«Osy júıeniń jańa bazalyq keshenderi ázirlenýde. Muǵalimder álemdik tájirıbege sáıkes jańa baǵdarlama boıynsha 3 aılyq daıarlyqtan ótedi. Qaıta daıarlaý úlgisi arqyly sanattaryna qosymsha jańa biliktilik deńgeıi beriledi. Osyǵan sáıkes, jalaqyǵa qosymsha aqy tólenedi»,-dedi mınıstr.
B. Jumaǵulovtyń atap ótkenindeı, jańa júıemen qatar, pedagogıkalyq joǵary oqý oryndarynyń janynan biliktilikti arttyrý ortalyqtaryn, Nazarbaev ýnıversıtetinde «Bilim» fakýltetin ashý qajet. Osy jyly qaıta daıarlaýdyń jańa túri ıaǵnı, biliktilikti qashyqtyqtan arttyrý ádisnamasy ázirlenýi tıis.
Mınıstrdiń aıtýynsha, biliktilik deńgeıin rastaý rásimi de jasalatyn bolady. «Osylaısha, 2012 jyly biliktilikti arttyrýdyń jańa júıesi tolyǵymen jumys isteýi tıis»,-dep qadap aıtty ol.
QR Premer-Mınıstriniń orynbasary Erbol Orynbaevtyń qatysýymen ótip jatqan búgingi keńeıtilgen alqa otyrysyna, aımaqtyq bilim berý uıymdary basshylary, júzden asa joǵary oqý oryndarynyń rektorlary, balalar quqyǵyn qorǵaý departamentteri jáne 14 aımaqtan kelgen bilim jáne ǵylym salasynyń aımaqtyq baqylaý komıtetteriniń basshylary, ınstıtýt ǵalymdary qatysty.
