Muǵalimderdi jumysqa alýdyń ortalyqtandyrylǵan platformasy iske qosylady - Aımaǵambetov

ASTANA. QazAqparat – Jeltoqsan aıynda muǵalimderdi jumysqa alýdyń ortalyqtandyrylǵan platformasy iske qosylmaq. Bul jaıynda QR Oqý-aǵartý mınıstri Ashat Aımaǵambetov vedomstvonyń apparat jınalysynda málimet berdi, dep habarlaıdy QazAqparat tilshisi.

«Bul óte mańyzdy másele, pedagogter aıqyn, ashyq, ádil jolmen jumysqa qabyldanýy kerek. Sol úshin biz zańnamany ózgertip, jańa júıeni engizdik. «Aýrýyn jasyrǵan óledi», - degendeı biz osyndaı jergilikti deńgeıdegi bolyp jatqan máselelerdi jasyrmaımyz, aıqyn kórsetýimiz kerek. Ári qaraı da baqylap, tekserip otyramyz. Qalasa da, qalamasa da, kimniń múddesi bolsa da biz bul másele boıynsha naqty ádildikti ornatamyz. Muǵalimder tek qana konkýrspen, biliktiligin dáleldep, dıplom boıynsha jumysqa alynýy kerek», - dedi mınıstr.

Mınıstrlik bul problemany arnaıy platforma arqyly sheshýdi josparlap otyr.

«Joǵaryda kórsetilgen problemalardy júıeli sheshý úshin endi ortalyqtandyrylǵan arnaıy tsıfrlyq platformany osy jeltoqsan aıynda iske qosýǵa daıyndyq jumystaryn aıaqtap jatyrmyz. ıAǵnı, endi búkil mektepter jumysqa alý úshin osy platforma arqyly ózderiniń vakansııalaryn kórsetip, barlyq máselelerdi aıqyn, ashyq júrgizip, naqty tıisti sheshimdi iske asyrýǵa múmkindik alady. Óıtkeni biz kórip otyrmyz. Habarlandyrýdy eki saǵat ilip qoıady da, eki saǵattan keıin alyp tastap, «biz habarlandyrýdy ildik» degen sııaqty osyndaı syltaýlar bar», - dedi Ashat Aımaǵambetov.