Muǵalimderdi saılaý komıssııalarynyń quramyna qosýǵa tyıym salyna ma

ASTANA. QazAqparat – Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenova májilismenderdiń muǵalimderdiń saılaýǵa qatysýyn shekteýge jáne olardy saılaý komıssııalarynyń quramyna qospaýǵa qatysty saýalyna jaýap berdi, dep habarlaıdy QazAqparat tilshisi.

«Pedagog mártebesi týraly» QR Zańynyń 6-babynyń 1) tarmaqshasyna sáıkes Qazaqstan Respýblıkasynyń zańdarynda kózdelgen jaǵdaılardy qospaǵanda, pedagogti kásiptik mindetterimen baılanysty emes jumys túrlerine tartýǵa jol berilmeıdi. Sonymen qatar «Qazaqstan Respýblıkasyndaǵy saılaý týraly» Zańnyń 10-babynyń 3-tarmaǵyna sáıkes saılaý komıssııalarynyń múshelerin saıası partııalardyń ne ózge de qoǵamdyq birlestikterdiń usynystary negizinde tıisti máslıhattar saılaıdy. Bul rette saılaý komıssııasynyń quramyna usynylatyn adamdar onyń jumysyna qatysýǵa kelisetini týraly ótinishterin qosa beredi. Osylaısha, pedagogterdiń saılaý komıssııalaryna qatysýy erikti bolyp tabylady. Jalpy sizder kótergen máseleler boıynsha jumys jalǵasýda jáne Úkimettiń turaqty baqylaýynda», - delingen Tamara Dúısenovanyń jaýabynda.