Muǵalimder jalaqysy ortasha respýblıkalyq deńgeıden eki esege tómen - QR BǴM
ASTANA. 9 jeltoqsan. QazAqparat - Muǵalimderdiń ortasha jalaqysy ortasha respýblıkalyq deńgeıden eki esege tómen. Búgin Májilistegi Úkimet saǵatynda baıandama jasaǵan Bilim jáne ǵylym mınıstri Aslan Sárinjipov osylaı málim etti.
Mınıstr sóz arasynda mektep ınfraqurylymyn keshendi sheshý máselesiniń josparlanyp jatqanyn alǵa tartty. Onyń aıtýynsha, búgingi kúni apatty jáne úsh aýysymdy mektepterdiń ornyna salynatyn qurylys qajettiliginiń kartasy ázirlengen. «Jalpy, elimiz boıynsha apatty mektepterdiń kópshiligi Ońtústik Qazaqstan jáne Shyǵys Qazaqstan oblystarynda tur. Sonymen úsh aýysymdy mektepter Ońtústik Qazaqstan, Almaty oblystarynyń úlesinde bolyp otyr. Mektep ınfraqurylymyn damytýda mınıstrlik pen jergilikti atqarýshy organ arasyndaǵy memorandýmnyń orny zor. Ol qyryqtan astam ındıkatorlardy qamtyp, úsh jyldyq kezeńde birqatar máselelerdi sheshýge múmkindik beredi», - deıdi A. Sárinjipov.
Budan bólek, baıandama barysynda mınıstr muǵalimder jalaqysyn arttyrý máselesine de toqtaldy. «Búgingi tańda elimizdegi pedagogtardyń ortasha jalaqysy 55-60 myń teńgeni quraıdy. Bul ortasha respýblıkalyq deńgeıden eki esege tómen. Soǵan oraı osy baǵytta birqatar atqarylatyn jumystar da barshylyq», - deıdi vedomstvo basshysy. Bul rette muǵalim jalaqysyn arttyrý ekonomıkalyq jaǵdaıǵa sáıkes bolatynyn aıtqan mınıstr, jalpy biliktiligin arttyrǵan ustazdardyń jalaqysy 30-40 paıyzǵa kóteriletinin jetkizdi.
