Muǵalimder órt qaýipsizdigi erejelerin bile me: Úkimet basshysynyń jaýaby
ASTANA. QazAqparat - Sońǵy úsh jylda bilim berý uıymdarynda órt qaýipsizdigi talaptaryn buzýshylyqqa jol bergeni úshin 4537 laýazymdy tulǵaǵa aıyppul salynǵan. Mundaı málimet májilismen Baqtııar Mákenniń depýtattyq saýalyna Úkimet basshysy Baqytjan Saǵyntaevtyń bergen jaýabynda aıtylǵan, dep habarlaıdy QazAqparat tilshisi.
«Qaǵıdalarǵa sáıkes órtke qarsy taqyryp boıynsha bilim berý uıymdarynda bilim alýshylarmen tıisti sabaqtar men áńgimelesýler ótkizý kózdelgen. Órt qaýipsizdiginiń máseleleri orta bilim berý uıymdarynda «Ómir qaýipsizdiginiń negizderi» oqý kýrsynyń sheńberinde, mektepke deıingi uıymdarda «Balalardy mektepke deıingi tárbıeleýdiń úlgilik oqý jospary» sheńberinde oqytylady. Pedagog qyzmetkerler jumysqa órt qaýipsizdigi máseleleri boıynsha nusqama alǵan kezde, al jumystyń ereksheligi ózgergende yqtımal órtterdiń aldyn alý jáne sóndirý boıynsha qosymsha oqýdan ótkennen keıin ǵana jiberiledi», - delingen jaýapta.
Premer-Mınıstrdiń jaýabyna sáıkes, búgingi tańda bilim berý uıymdary órt qaýipsizdiginiń aldyn alý boıynsha aqparattyq buryshtar jáne alǵashqy órt sóndirý quraldarymen jaraqtandyrylǵan. Sondaı-aq kezeńder boıynsha órt qaýipsizdigi quraldarymen jáne azamattyq qorǵaýdy habarlaý júıesimen (órt sóndirýdiń alǵashqy quraldary, avtomattandyrylǵan órt dabylqaqqyshtary) jaraqtandyrý boıynsha jumys júrgizilýde.
«Sońǵy úsh jylda órt qaýipsizdigi talaptaryn buzýshylyqqa jol bergeni úshin jalpy 119,2 mln teńgeden astam somaǵa 4537 laýazymdy adam aıyppul túrindegi ákimshilik jaýapkershilikke tartyldy. Bilim berý nysandarynda órt qaýipsizdigi sharalaryn jetildirý maqsatynda jergilikti atqarýshy organdar tıisti is-sharalar josparlaryn bekitti. Órt qaýipsizdigi salasynda qyzmet kórsetetin uıymdarmen sharttar jasalýda. Bilim berý uıymdary azamattyq qorǵanys (AQ) jáne tótenshe jaǵdaılar, bilim alýshylardy shuǵyl evakýatsııalaýdyń jospar-syzbalary bekitildi, quramalar (AQ shtaby) jasaqtalyp, jaýaptylar taǵaıyndaldy, órt sóndirý qyzmeti organdarymen birlesip mektep ujymdary men oqýshylaryna ınteraktıvti sabaqtar júrgiziledi», - dep habarlady Baqytjan Saǵyntaev.
Úkimet basshysynyń jaýabyna sáıkes, Shyǵys Qazaqstan, Soltústik Qazaqstan, Jambyl, Aqtóbe jáne Qyzylorda oblystarynyń ákimdikteri tekseris barysynda anyqtalǵan kemshilikterdi jańa oqý jyly bastalǵanǵa deıin joıýdy josparlap otyr.
Eske sala ketsek, 2 mamyrda ótken Parlament Májilisiniń jalpy otyrysynda depýtat Baqtııar Máken muǵalimderdiń órt qaýipsizdigi erejelerin bilmeýine alańdaýshylyǵyn bildirgen bolatyn. Onyń aıtýynsha, QR ІІM 2017 jyldyń mamyrynan bastap bilim berý mekemelerinde órt qaýipsizdigine tekserister júrgizgen. Tekseristiń nátıjeleri boıynsha 33 myńnan astam órt qaýipsizdigi talaptaryn buzýshylyq anyqtalǵan.
