Muǵalimder kúni: Qaraǵandy oblysynda ardager pedagogtar marapattaldy

QARAǴANDY. QazAqparat – Qaraǵandy oblysynda Muǵalimder kúnine oraı pedagogtarǵa sı-qurmet kórsetilip, vedomstvolyq nagradalar tapsyryldy, dep habarlaıdy QazAqparat tilshisi.

Qaraǵandynyń jańa Oqýshylar saraıynda Qaraǵandy qalasynyń №78 mektebiniń qazaq tili men ádebıeti pániniń muǵalimi Maǵrıpa Káribekova men Shahtınsk qalasynyń «Snegýrochka» bóbekjaıynyń ádiskeri Alfııa Nasıbýllına «Eńbek ardageri» medalimen marapattaldy.

Sondaı-aq, bes eńbek sińirgen muǵalim – Olga Tarasenko, Quralaı Muhanova, Raısa Eleýsizova, Menzıf Mýrtazına jáne Serik Balpanov – bilim berýdegi kópjyldyq jáne jemisti eńbegi úshin metsenat Bekzat Altynbekov taǵaıyndaǵan 500 myń teńge mólsherindegi syılyqqa ıe boldy.

Aqtas kentindegi №16 mekteptiń qazaq tili men ádebıeti pániniń muǵalimi Zıra Satovaǵa QR Premer-Mınıstri Asqar Mamınniń alǵys haty tabys etildi. Bilim salasynda ol 34 jyldan beri jumys isteıdi.

«Aldymen hımııa jáne bıologııa pánderiniń muǵalimi bolyp, keıin «Qazaq tili men ádebıeti pániniń muǵalimi» mamandyǵy boıynsha ekinshi joǵary bilim aldym. Men áli kúnge deıin osy pándi oqytamyn. Qazir kásibı ósý úshin kóptegen múmkindikter bar. Tek qana alǵa basyp, oqytýda jańa shyǵarmashylyq ıdeıalar men tehnologııalardy engizý qajet. Meniń eńbegimdi joǵary baǵalaǵanyma qýanyshtymyn», – dedi Zıra Satova.

Taǵy 19 pedagog eren eńbekteri úshin «QR Bilim berý isiniń qurmetti qyzmetkeri» (segiz muǵalim), «Bilim jáne ǵylym qyzmetkerleriniń kásipodaǵyna sińirgen eńbegi úshin» (úsheýi) jáne «Y. Altynsarın» (segiz adam) tósbelgilerimen marapattaldy.