Muǵalimder qaǵazdan tolyǵymen bas tartýǵa daıyn emes
ASTANA. QazAqparat - Elimizdegi muǵalimder «e-learning» júıesine kóship, qaǵazdan tolyǵymen bas tartýǵa daıyn emes. Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda málim boldy.
Toqtala ketetin jaıt, onda elimizdegi aqparattandyrý jobalarynyń júzege asyrylýy talqylanǵan bolatyn.
«e-learning» jobasynyń basty maqsattarynyń biri - muǵalimdi tikeleı oqý úderisimen baılanysty emes fýnktsııalardan bosatý bolatyn. Shyndyǵynda, muǵalimniń oqýdy josparlaý, tapsyrmalar berý, ony tekserý, sekildi jumystary bastan asady, esep berýler de óte kóp. Sonymen qatar, muǵalim óziniń ýaqytynyń 30 paıyzdan astamyn oqytýdan bólek jumystarǵa jumsaıdy», - deıdi «Ulttyq aqparattyq tehnologııalar» AQ Basqarma tóraǵasy Rýslan Eńsebaev.
Onyń aıtýynsha, búgingi kúni elimizdegi 1559 mekteptegi muǵalimderdiń 70 paıyzy «e-learning» júıesin paıdalanyp júr. «Shyndyǵynda búgingi kúni muǵalimderdiń jumystary qosarlanyp jatyr. Sondyqtan da, bul baǵytta eń aldymen qaǵaz boıynsha jumystardyń bir-birin qaıtalanýyn boldyrmaý kerek», - dedi Rýslan Eńsebaev.
Sóz arasynda jıynǵa qatysyp otyrǵan vıtse-spıker Darıǵa Nazarbaeva «Muǵalimder búgin qaǵazdan bas tartýǵa daıyn ba?» degen suraq qoıǵan bolatyn. «Árıne, búgingi kúni barlyq mektepter saqadaı saı tur, barlyǵy daıyn dep aıta almaımyz»- dedi Bilim jáne ǵylym mınıstrligi Mektepke deıingi, orta bilim jáne aqparattyq tehnologııalar departamentiniń dırektory Jańyl Jontaeva.
«Elimizde 293 myń pedagog bar, sonyń jyl saıyn 8 myńy osy júıemen oqıdy, sonymen qosa, jyl saıyn jańadan 10-12 myń pedagog qyzmetke keledi. Sondyqtan da, búgingi kúni tolyǵymen qaǵazdan bas tarta alamyz dep aıtýǵa erterek», - dedi J. Jontaeva.
Óz kezeginde vıtse-spıker «e-learning» jobasynyń tıimsiz bolyp otyrǵanyn alǵa tartty. «Bunyń bárin ne úshin aıtyp otyrmyz, aqparattyq tehnologııalar «e-learning» jobasyn ázirlegenimen, ony paıdalanatyn kadr bolmasa oǵan jumsalǵan qarajat qumǵa sińgen sýdaı. Júıe bar, engizýge tyrysyp jatyrsyzdar, alaıda bilim júıesi oǵan daıyn emes», - dedi D. Nazarbaeva.
