Muǵalimder eńbekaqysyn kóterýge qatysty esepteýler jasaldy - Saǵadıev
ASTANA. QazAqparat - Búgin elordada ótken esepti kezdesýde QR Bilim jáne ǵylym mınıstri Erlan Saǵadıev muǵalimderdiń eńbekaqysyn kóterý jaıynda qoıylǵan suraqqa jaýap berdi, dep habarlaıdy QazAqparat.
«Bul óte mańyzdy másele ekeni belgili. Aǵymdaǵy jyly pedagogtardyń kásibı standartyn qabyldaýǵa baılanysty jalpy eńbekaqyny kóterýge nıettimiz»,-dep toqtaldy mınıstr.
Onyń sózine qaraǵanda, eńbekaqyny joǵarylatý boıynsha mınıstrlik tıisti esepteýlerdi jasady.
«Qazaqstanda bıýdjet qalaı qabyldanatynyn bilesizder, ıaǵnı biz esepteýlerdi Qarjy mınıstrligine tapsyramyz, olar óz kezeginde ony Respýblıkalyq bıýdjettik komıssııaǵa shyǵarady. Odan soń bul másele Parlamenttiń qaraýyna engizilip, depýtattar ózderiniń usynystaryn jasaıdy. Bıýdjet múmkindigine qaraı tıisti sheshim qabyldanady»,-dep túsindirdi Saǵadıev.
Bilim jáne ǵylym mınıstri atalǵan máselege qatysty barlyq esepteýlerdiń jobasy pedagogıkalyq qoǵamdastyqpen kelisilgenin atap ótti.
«Jalpy eńbekti tóleý júıesin ózgertýge tyrysýdamyz»,-dep túıindedi mınıstr.
