Muǵalimder 30 paıyzdyq ústeme aqyny osy aıda alady - BǴM
ASTANA. QazAqparat - Muǵalimderdiń jalaqysyn kóterý úshin respýblıkalyq bıýdjetke ózgerister engizý kerek. Oǵan biraz ýaqyt ketedi. Sondyqtan ázirshe jergilikti bıýdjetterdiń esebinen 30 paıyzdyq ústeme aqyny tóleý týraly sheshim qabyldandy, dep habarlaıdy QazAqparat tilshisi.
«Búgin ǵana respýblıkalyq bıýdjet komıssııanyń otyrysy ótti. Olar (muǵalimderdiń jalaqysyn 30 paıyzǵa kóterý týraly - avt.) qaýlynyń jobasyn maquldady. Kelesi aptada Úkimettiń kezekti otyrysynda daýysqa salaıyn dep otyrmyz. Sodan keıin atalǵan qujat aımaqtarǵa jiberiledi. Sonyń negizinde jergilikti atqarýshy organdar muǵalimderdiń qańtar aıyndaǵy jalaqysyn jańa júıe boıynsha tóleı alady. Biz úshin, eń bastysy, muǵalimder jalaqynyń kóterilgenin osy aıdyń sońynda kórýi tıis», - dedi QR Bilim jáne ǵylym vıtse-mınıstri Bıbigúl Asylova QazAqparat tilshisine bergen suhbatynda.
Onyń aıtýynsha, ázirshe 30 paıyzdyq ústeme aqy jergilikti bıýdjetterdiń esebinen tólenedi. Artynan respýblıkalyq bıýdjetti naqtylaǵannan keıin ákimdikterdiń barlyq shyǵyndary óteledi.
«Óıtkeni bıýdjetti naqtylaýǵa uzaq ketedi. Parlamenttiń talqylaýynan ótkizý kerek jáne taǵysyn taǵy. Sondyqtan ázirshe jergilikti bıýdjetterdiń esebinen kótergendi jón kórdik», - dep atap kórsetti B.Asylova.
Aıta keteıik, jospar boıynsha aǵymdaǵy jyldyń 1 qańtarynan bastap bilim berýdiń jańartylǵan mazmunyna kóshýine qaraı 1-shi, 2-shi, 5-shi jáne 7-shi synyp muǵalimderiniń aılyǵy kóteriledi. Al qyrkúıekte 3-shi, 6-shy jáne 8-shi synyp ustazdary eńbekaqynyń 30 protsentke artqanyn kóre alady. Budan bólek, kelesi jyly qyrkúıek aıynda 4-shi, 9-shy jáne 10-shy synyp muǵalimderiniń jalaqysy kóbeıse, 2020 jyly 11-synyp muǵalimderiniń aqshasy artady degen jospar bar.
Foto: Liter.kz
