Muǵalim úshin eń qundy nárse - oqýshylarynyń syılastyǵy men estelikteri –ustaz

Raýshan Toqbaeva - Shyǵys Qazaqstan oblysynyń týmasy, kópbalaly otbasynda muǵalimdik joldy tańdaǵan jalǵyz bala.

«1968 jyly mektep bitirdim. Anam ylǵı aıtyp otyratyn, mamandyqtardyń ishindegi eń jaqsysy muǵalim bolý dep. Qarapaıym, kópbalaly otbasynan shyqqanmyn. Ata-anam aýylda sharýashylyqpen aınalysatyn. Instıtýtqa túsetin ýaqyt kelgende anamnyń keńesimen muǵalimdikke tústim.

1968 jyly arman qýyp Almatyǵa keldim. Sol jyly Qazaq Qyzdar pedagogıkalyq ýnıversıtetine «orys tili men ádebıeti muǵalimi» mamandyǵyna baǵym janyp oqýǵa tústim», - dedi ol.

Tájirıbeli pedagog sol kezde eń irgeli, eń tereń bilimdi, óz isiniń mamandarynan tereń bilim alǵanyn aıtty.

«Instıtýtta oqyp júrgen kezimizde Almatynyń mektepterinde tájirıbeden ótetinbiz. Barlyq teorııalyq bilimimizdi tájirıbe júzinde júzege asyrýǵa múmkindik boldy. Instıtýtty bitirgen soń men týǵan jerime oraldym.

Kókpekti aýdanynan 75 shaqyrymda Úlgili malshy aýylyna Abaı atyndaǵy mektepke muǵalim bop keldim. 1972 jyldan eńbek jolym bastaldy», - dep jalǵady áńgimesin.

Ómir aǵyny Raýshandy óz mektebine ákeldi. 22 jasynda ol óz oqyǵan mektebine oqý isiniń meńgerýshisi bolyp oralǵan.

«22 jasymda men turmys qurdym. Otaǵasynyń kóshpeli qyzmet babyna sáıkes jıi jumys aýystyrýyma týra keldi. «Býkon» aýylyna muǵalim bolyp bardym, odan azdan soń aýdan ortalyǵyna keldik. Sol jyldary muǵalimder aýdandardy aralap aǵartý jumystaryn júrgizetin. Men de solardyń qatarynda boldym. Qurmet taqtasynda aýdannyń úzdik muǵalimi degen atym turdy», - dedi keıipker.

Jas maman 1984 jyly otbasymen Almaty oblysyna kóship kelgen.

«Qaskeleń aýdanyndaǵy «Bereke» aýylynda meniń mamandyǵym boıynsha bos oryn joq edi. Eńbek ótilim joǵalmaýy úshin bastaýysh synypqa sabaq berdim», - dedi ol.

Almaty oblysynda Raýshan Toqbaeva óziniń biliktiligi men kásibıliginiń arqasynda mektep dırektorynyń orynbasary qyzmetine, 1992 jyly dırektordyń birinshi orynbasary qyzmetine taǵaıyndalǵan.

2000 jyly Qazaqstanda jańa oqý standarty jasalǵan edi. Bul protseske eldegi eń bilikti ustazdar qatysqan. Raýshan Toqbaeva da eńbegi sińgen pedagog retinde osy mańyzdy qujatqa ózgerister men tolyqtyrýlar engizýge belsene atsalysqan.

Onyń aıtýynsha, buryn muǵalim mártebesi óte bıik bolǵan.

«Bizdiń zamanymyzda muǵalimdi óte syılaıtyn. Ol kezde biz kitap tapshylyǵynan bastap barlyq qıyndyqty bastan ótkerippiz. Ol kezde qazirgideı ınternet joq. Qazir nemerelerimdi oqyta otyryp, bilim berý salasynda kóp ózgeris baryn baıqaımyn. Balalar birinshi klastan bastap aǵylshyn tilin oqıdy. Menińshe, bul bala úshin tym aýyr bolady. Óskeleń urpaqta til mádenıeti qalyptasýy kerek. Olar birinshi kezekte qazaq jáne orys tilderin meńgerýi kerek. Shet tilin 4 klastan engizýge bolady», - dedi ol.

Qurmetti eńbek demalysyna kelgen kezde mektep ujymy Raýshan Hasenqyzynan qatardaǵy pán oqytýshysy bop qalýyn ótingen. Osylaısha tájirıbeli ustaz taǵy 5 jyl balalardy bilim nárimen sýsyndatqan.

Bıyl Raýshan Toqbaeva 70 jasqa tolady. Osy jasyna deıin bloknot pen qalamsaby qolynan túspeıdi.

«Men keıde óleń jazamyn. Án aıtamyn. Túrli taqyryptarǵa esse, retsenzııa jazyp turamyn»,- dedi ol.

Muǵalim eshqashan balany qorqytyp qurmetti bola almaıdy. Ol tek jeke qasıetteri men kásibı sheberliginiń arqasynda oqýshylardyń esinde qalady.

«Men eshqashan oqýshylarǵa ekilik qoımappyn. Eger balada qıyndyq bolsa, jaǵdaıyn bilýge tyrysatynmyn. Bizdiń aýyl kishkentaı. Adamdar barlyǵy birin biri tanıdy. Kópshilik otbasynda ne bolyp jatqanyn bilemin. Balalarmen ashyq sóılesýge tyrysatynmyn. Oqýshylarmen kezdesýge jiti daıyndalatynmyn. Sebebi, olardyń kez-kelgen suraǵyna jaýap berýim kerek»,- dedi ol.

Raýshan Toqbaeva 49 jyl muǵalimdik etken. Ustazdyq ǵumyrynda birneshe alǵys hattarmen marapattalǵan, Bilim berý isiniń úzdigi atanǵan.

«Meniń oqytqan 16 oqýshym Altyn belgi ıegeri atandy. Kóptegen oqýshylarym óz isiniń mamanyna aınaldy. Adelııa Amraeva degen oqýshym qazir balalar jazýshysy. Fızıka páninen Meıirjan men Rýslan Baımahanovtar Bolashaq baǵdarlamasymen shetelde oqyp keldi. Olardyń barlyǵy ómirden óz jolyn tapqanyna qýanamyn», - dedi ustaz.