Muǵalim oqýshylardyń mańdaıyna «dápter» dep jazǵan: Mınıstr pikir bildirdi

NUR-SULTAN. QazAqparat – Kókshetaý qalasynda mektep muǵalimi dápterin umytyp ketken oqýshylardyń mańdaıyna «Dápter» dep jazyp bergen. Bolǵan oqıǵaǵa qatysty QR Bilim jáne ǵylym mınıstri Ashat Aımaǵambetov túsinikteme berdi, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken baspasóz máslıhaty barysynda QR Bilim jáne ǵylym mınıstri Ashat Aımaǵambetovke: «Kókshetaý qalasynda bastaýysh synyp muǵalimi dápterin umytyp ketken 12 oqýshynyń mańdaıyna «Dápter» dep jazyp bergen. Osy oqıǵaǵa qatysty qandaı pikir bildirer edińiz?», - degen suraq qoıyldy.

«Muǵalim aldymen adamgershiligi mol jáne meıirimdi bolý kerek. Árıne, bul muǵalimge tán qasıet emes, shynymdy aıtsam sene alar emespin. Qazirgi ýaqytta atalǵan oqıǵaǵa qatysty tıisti sheshim qabyldandy. Osy sekildi oqıǵa qaıtalanbaýy úshin shara qabyldap, aldyn alýymyz kerek. Osy turǵyda aıtyp ótetin mańyzdy jaıt, muǵalimderdiń bári birdeı emes. Oqýshylardy balasyndaı jaqsy kórip, tárbıe, bilim berip jatqan úlgili pedagogtar jetkilikti. Ókinishke qaraı, ómir bolǵan soń teris jaǵdaılar oryn alyp turady», - dep jaýap berdi Ashat Aımaǵambetov.

Buǵan deıin mınıstr Túrkistanda mektep dárethanasyndaǵy tóbelesten keıin 5-synyp oqýshysynyń kóz jumǵan oqıǵasyna qatysty túsinikteme berdi.