Muǵalim: Іndetti aýyzdyqtaýdyń bir joly – jappaı ekpe alý
ORAL. QazAqparat – Іndetti aýyzdyqtaýdyń bir joly – jappaı ekpe alý. Bul týraly Oral qalasyndaǵy №43 orta mekteptiń dene shynyqtyrý pániniń muǵalimi Tilek Qýanyshkereev málim etti, dep habarlaıdy QazAqparat tilshisi.
Onyń aıtýynsha, qazirgi ýaqytta álem elderinde koronavırýsqa qarsy vaktsına egý qarqyndy júrgizilýde.
-Bul indettiń aldyn alý nemese oǵan birjola tosqaýyl qoıý úshin osy ekpeni jappaı alý qajet dep oılaımyn. Osy maqsatta óz erkimmen №3 qalalyq emhanaǵa jumys ornym arqyly ekpe alýǵa jazyldym, - deıdi Tilek Ádilgereıuly.
Muǵalimniń sózine qaraǵanda, 15 naýryz kúni «Spýtnık V» vaktsınasynyń birinshi komponentin alǵan. Emhana dárigerleri ekpeden keıin qyzýdyń kóterilýi, deneniń salqyndap, álsizdenýi sekildi bolýy múmkin jaıttardy eskertken. Ózderi de uıaly telefon baılanysy arqyly jaǵdaıyn bilip otyrǵan.
«Vaktsına salǵannan keıin ekinshi kúnnen bastap eki-úsh kún qolymdy qozǵaǵan kezde ekpeniń orny aýyrsynyp júrdi.
Basqalaı eshteńe bolǵan joq. 5 sáýir kúni ekpeniniń ekinshi komponentin alamyn. Bul ne úshin kerek? Eń aldymen óz densaýlyǵyń úshin qajet. Ekinshiden, qyzmet barysynda kópshilikpen aralasatyn bolǵandyqtan, saqtyq kerek.
Ózińniń aýyrmaıtynyńa degen senim arta túsedi. Barsha halyqty áleýmettik jelidegi alyp-qashpa áńgimege senbeı, ekpe alýǵa shaqyramyn. Іndetten tezirek qutylyp, elimiz aman, jurtymyz tynysh bolǵaı», dedi QazAqparat tilshisine T.Qýanyshkereev.
Eske sala keteıik, budan buryn Batys Qazaqstanda 3 myńnan astam medqyzmetkerdiń koronavırýs ekpesin saldyrǵanyn, sońǵy aptada indet juqtyrý deńgeıi 20,5 paıyzǵa óskenin jazǵan bolatynbyz.
Sondaı-aq polıtseı otbasyn oılaǵandyqtan da ekpe saldyrtqanyn jetkizdi.
