Muǵalim bolǵysy kelmeıtinder pedagog mamandyqtarǵa oqýǵa túsýde - depýtat
ASTANA. QazAqparat - Muǵalim bolǵysy kelmeıtin jastar pedagog mamandyqtarǵa oqýǵa túsýdi jalǵastyryp jatyr. Bul týraly Májiliste Áleýmettik-mádenı damý komıtetiniń jáne «Nur Otan» partııasy fraktsııasy janyndaǵy áleýmettik keńestiń birlesken otyrysynda depýtat Natalıa Jumadildaeva málim etti, dep habarlaıdy QazAqparat.
«Pedagog mamandyǵy bedeliniń problemasy Qazaqstan úshin de ózekti. Qazaqstanda pedagogtyń eńbekaqysy elimiz boıynsha ortasha jalaqydan az ekeni belgili. 2017 jyldyń ekinshi toqsanyndaǵy statıstıkalyq málimetterine toqtalsaq, pedagogtyń ortasha eńbekaqysy 99 myń teńge. Al elimizdegi ortasha jalaqy 140 265 teńgege deıin. Bul óz kezeginde tómen jalaqy salaǵa talantty ári daryndy jastardy tartýǵa múmkindik bermeı otyr»,- dep toqtaldy Jumadildaeva.
Onyń sózine qaraǵanda, Qazaqstanda «Altyn belgi» ıegerleri arasynda tek 5-7 paıyzy ǵana bilim berý mamandyqtaryn tańdaǵan. Al memlekettik grantty alýǵa UBT-nyń shekti upaıynyń tómendigi bul salaǵy qyzyǵýshylyǵy joq jastardyń kelýine sebep bolýda.
«Alaıda dıplom alǵanymen pedagogıkalyq JOO-lardyń túlekteri kóbine óz mamandyǵymen jumys istemeıdi. 2015 jyly Qazaqstanda pedagogıkalyq mamandyqtardaǵy túlekterdiń tek 35 paıyzy oqýyn támamdaǵan jyly jumysqa turǵan. Ókinishke qaraı, odan keıingi tyń málimetter maǵan usynylmady»,-dedi depýtat.
Onyń atap ótýinshe, búginde Qazaqstanda pedagogtyń qoǵamdaǵy mártebesi týraly aıqyn málimetter joq. Halyqaralyq deńgeıde pedagog kásibiniń mártebesin baǵalaýǵa múmkindik beretin tetikter jumys isteýde.
«Búginde elimizde kadrlardyń turaqsyzdyǵy boıynsha statıstıka ulttyq deńgeıde júrgizilmeıdi. Osyndaı derekterdiń joqtyǵy aǵymdaǵy jaǵdaıdy, problemalardy ári mamandardyń jumysynda turaqtamaýyna qatysty máseleni baǵalaýǵa tolyq múmkindik bermeıdi. Bul óz kezeginde pedagogtyń mártebesin joǵarylatý úshin qajetti sharalardy aıqyndaýǵa kedergi keltiredi»,- dep túıdi depýtat.
Aıta keteıik, búgin Májiliste ótken bul otyrys barysynda muǵalim mamandyǵynyń bedelin kóterý máselesi talqylandy.
QR Bilim jáne ǵylym vıtse-mınıstri Ashat Aımaǵambetov mektep dırektorlary úshin eńbekaqyny saralanǵan túrde tóleý qarastyrylyp jatqanyn aıtty.
Sonymen qatar, mınıstrlik muǵalimderdi qorǵaýdyń qadamdaryn eskerýde. Osy oraıda Qazaqstanda mektepter men ata-analar arasynda kelisim bekitý josparlanyp otyr.
foto:parlam.kz
